राज ठाकरेंच्या पाठिंब्यानंतर बच्चू कडूंच्या आंदोलनाला बळ!

मराठवाड्यातून निघणाऱ्या कर्जमाफी यात्रेसाठी बच्चू कडू यांच्याकडून राज ठाकरेंना औपचारिक आमंत्रण देण्यात आले आहे. या आमंत्रणाचा स्वीकार करत राज ठाकरेंनी सकारात्मक प्रतिसाद दिला आहे. या भेटीत शेतकऱ्यांचे प्रश्न हाच संवादाचा विषय होता. शेतकऱ्यांना न्याय मिळायला हवा. एकीकडे शेतकरी अडचणीत आहे, मात्र राज्य सरकार त्याची टिंगल करत आहे. दुष्काळ पडला की कर्जमाफी, असे मुख्यमंत्री देवेंद्र फडणवीस म्हणतात, ही एकप्रकारे त्यांची टिंगलच आहे. शेतमालाला भाव मिळत नाही, हे शेतकऱ्यांचे दुष्काळापेक्षाही मोठे दु:ख आहे. भविष्यात राज्यव्यापी आंदोलन होईल तेव्हा मुंबईनेही या आंदोलनात एक ते दोन तास शेतकऱ्याच्या पाठी उभे राहावे, यासाठी राज ठाकरेंना आमत्रंण दिले आहे, तसेच त्यांनी शेतकऱ्यांना मार्गदर्शनही करावे, अशीही त्यांना विनंती केल्याचे बच्चू कडूंनी स्पष्ट केले आहे.

बच्चू कडू यांनी काढलेल्या शेतकऱ्यांसाठीच्या पदयात्रेत राज ठाकरेंच्या आदेशानुसार आपण यापूर्वीही सहभागी झालो होतो. त्यांच्या भावना शेतकऱ्यांच्या हितासाठीच आहेत. मराठवाडा, विदर्भातील शेतकरी आणि दिव्यांग बंधूंचे प्रश्न सुटावेत, साठी अशी त्यांची भावना आहे. त्यामुळे तिथे राज ठाकरेंची एक सभा व्हावी, अशी बच्चू कडू यांची इच्छा आहे. त्यानुसार राज ठाकरेंनी सकारात्मक प्रतिसाद दिला आहे. तसेच शेतकऱ्यांसाठी काही काळ मुंबई बंद राहावी, यावर आम्हीही सकारात्मक आहोत, वेळ आली तर त्याला आम्हीही पाठिंबा देऊ, असे बाळा नांदगावकर यांचे म्हणणे आहे.

बच्चू कडू हे मूळचे शिवसैनिक आहेत. त्यांची राज ठाकरे यांच्यासोबत जुनी ओळख आहे. बच्चू कडू यांनी स्वतंत्रपणे प्रहार संघटना स्थापन करून शेतकरी, शेतमजूर, दिव्यांगांचे प्रश्न हाती घेतले. अभिनव पद्धतीने आंदोलने करून सरकारला मागण्यांची दखल घेण्यास त्यांनी भाग पाडले. पण, विधानसभा निवडणुकीत त्यांचा पराभव झाला. महायुतीत असूनही विरोधी राजकारण केल्याचा ठपका त्यांच्यावर होता. आता शेतकरी कर्जमाफी आंदोलनाच्या निमित्ताने बच्चू कडू यांनी पुन्हा भाजपला म्हणजेच महायुती सरकारला आव्हान दिले आहे. महसूल मंत्री चंद्रशेखर बावनकुळे यांच्यासोबत त्यांचे खटके उडाले आहेत. आता राज ठाकरे यांच्या पाठिंब्यानंतर तयार होणाऱ्या नवीन समीकरणांवर सरकार काय भूमिका घेणार, याकडे अनेकांचे लक्ष आहे.