रेल्वेने परीक्षेची तारीख बदलून देण्याची मागणी महाराष्ट्र लोकसेवा आयोगाकडून घेण्यात येणारी राज्यसेवा परीक्षा आणि रेल्वे भरतीची परीक्षा एकाच दिवशी येत असून त्यामुळे या दोन्ही परीक्षा देणाऱ्या उमेदवारांची अडचण झाली आहे. रेल्वेने परीक्षेची तारीख बदलून द्यावी अशी मागणी उमेदवारांकडून करण्यात येत आहे. या वर्षीची राज्यसेवा पूर्वपरीक्षा येत्या १० एप्रिलला होत आहे. अ आणि ब गटातील १०९ पदांसाठी ही परीक्षा होणार आहे. याच दिवशी रेल्वे भरतीचीही परीक्षा घेण्यात येणार आहे. ब आणि क गटांतील पदांसाठी ही परीक्षा होत आहे. जास्त पदसंख्या असल्याने दोन्ही परीक्षा देणारे उमेदवार मोठय़ा प्रमाणावर आहेत. रेल्वेकडून घेण्यात येणारी परीक्षा ही ऑनलाइन होणार असून ती एकापेक्षा अधिक दिवस चालणार आहे. त्यामुळे राज्यसेवा परीक्षा देणाऱ्या उमेदवारांना रेल्वेने परीक्षेची तारीख बदलून द्यावी, अशी मागणी उमेदवारांनी केली आहे.
