लोहगाव विमानतळ विस्तारीकरणाला लष्कराकडून पंधरा एकर जागा उपलब्ध

पुण्यातून विमान प्रवास करणाऱ्या नागरिकांची वाढलेली संख्या आणि पुण्याहून होणाऱ्या विमान उड्डाणांमध्ये झालेली वाढ, या पाश्र्वभूमीवर पुण्याच्या विमानतळाची क्षमता वाढवण्याचा गेली १५ वर्षे चर्चेत असलेला मुद्दा अखेर निकाली निघाला आहे. लोहगाव विमानतळाला लागून असलेली लष्कराची १५ एकर जागा विमानतळाला देण्यास संरक्षण मंत्रालयाने मान्यता दिली असून, आणखी ६ ते ८ एकर जागा मिळवण्यासाठी प्रयत्न सुरू आहेत, अशी माहिती केंद्रीय रस्ते वाहतूक मंत्री नितीन गडकरी यांनी दिली.
गडकरी यांनी लोहगाव विमानतळाच्या जागेची रविवारी पाहणी केली. यानंतर ते पत्रकार परिषदेत बोलत होते. लोहगाव विमानतळासाठी २२ एकपर्यंत जागा मिळवण्याचा प्रयत्न असल्याचे सांगून ही क्षमतावाढ पुढील जास्तीत जास्त ६ ते १० वर्षेच पुरी पडू शकेल, असेही गडकरी यांनी स्पष्ट केले. ते म्हणाले,‘विमानतळ विकास प्राधिकरणाने प्रथम संरक्षण मंत्रालयाकडे ४ एकर जागेची मागणी करण्याचे ठरवले होते. परंतु ती जागा तुटपुंजी असल्यामुळे सध्याच्या विमानतळाच्या पुढे असलेली १५ एकर जागा लष्कराकडून भाडेतत्त्वावर मिळावी असे सुचवले. ही जागा देण्याचे संरक्षण मंत्रालयाने मान्य केले आहे. विमानतळाजवळ एका ठिकाणी लष्कराचे विमानचालन उपकरण बसवण्यात आले आहे व तिथपासून ३०० मीटरचा परीघ मोकळा सोडावा लागतो. या उपकरणाच्या आजूबाजूची ३५० मीटर जागा सोडून त्याच्या पुढे असलेली आणखी ५ ते ८ एकर जागा विमानतळाला मिळावी यासाठी मी संरक्षण मंत्रालयाशी चर्चा करीन.’
विमानतळाच्या आजूबाजूला १०० मीटर क्षेत्रात बांधकाम करता येत नसल्यामुळे या पट्टय़ातील जागा विमानतळासाठी मिळवण्याच्या दृष्टीने जिल्हाधिकारी व महापालिका आयुक्त प्रस्ताव तयार करतील, असेही ते म्हणाले.