पुणे: नगर रस्त्यावरील वाघोलीमध्ये शाळकरी मुलीचा वडिलांनीच कुऱ्हाडीने वार करून खून केल्याची घटना घडली. घटनेनंतर वडील पसार झाले असून, त्यांच्याविरुद्ध लोणीकंद पोलीस ठाण्यात गुन्हा दाखल करण्यात आला आहे. कौटुंबिक वादातून वडिलांनी मुलीचा खून केल्याची शक्यता पोलिसांनी व्यक्त केली आहे. अक्षता फकिरा दुपारगुडे ( वय १५, सध्या रा. वाघोली, मूळ रा. सोलापूर) असे खून झालेल्या मुलीचे नाव आहे. उपचारासाठी तिला ससून रुग्णालयात दाखल करण्यात आले होते. तिच्या काकाने याबाबत पोलिसांकडे फिर्याद दिली आहे. अक्षताचे वडील बांधकाम मजूर आहेत. आई गृहिणी आहे. ती वाघोलीतील एका शाळेत शिकते. अक्षताची आई घरकामासाठी सकाळी बाहेर पडली. त्यावेळी वडिलांंनी तिच्याशी वाद घालण्यास सुरुवात केली. रागाच्या भरात वडिलांनी तिच्यावर कुऱ्हाडीने वार केले. या घटनेत ती गंभीर जखमी झाली होती. हेही वाचा. विजयस्तंभ अभिवादन सोहळ्यात सोनसाखळी चोरणारी टाेळी गजाआड या घटनेची माहिती मिळाल्यानंतर नातेवाईक आणि रहिवाशांनी तिला तातडीने ससून रुग्णालयात दाखल केले. लोणीकंद पोलीस ठाण्याचे वरिष्ठ पोलीस निरीक्षक विश्वजित काइंगडे यांनी घटनास्थळी भेट दिली. मुलीचा खून करून वडील पसार झाले. त्यांच्या शोधासाठी पोलिसांची पथके रवाना झाली आहेत. लोणीकंद पोलीस ठाण्यात याप्रकरणी गुन्हा दाखल करण्यात आला आहे.
