पिंपरी : भारतीय जनता युवा मोर्चाच्या (भाजयुमो) प्रदेशाध्यक्षाच्या नावाने भाजपच्याच महिला पदाधिकाऱ्याला जीवे मारण्याची धमकी दिल्याचा प्रकार समोर आला आहे. ही घटना चिंचवड येथे घडली. याप्रकरणी भाजयुमोचे प्रदेशाध्यक्ष अनुप मोरे यांच्यासह सात जणांविरोधात गुन्हा दाखल करण्यात आला आहे. यात दोन महिलांचाही समावेश आहे.
पोलिसांनी दिलेल्या माहितीनुसार, फिर्यादी महिला भाजपाची पदाधिकारी आहे. २६ ऑक्टोबर रोजी दुपारी दोनच्या सुमारास फिर्यादी महिला त्यांच्या ओळखीतील एका व्यक्तीला भेटण्यासाठी चिंचवड येथे गेल्या होत्या. दरम्यान, बंगल्याबाहेर संशयितांनी आमचा दादा अनुप मोरे येथे असताना तू येथे का आलीस, असे विचारून धमकी दिली.
फिर्यादी महिला पुन्हा बंगल्यात परत गेली. एक व्यक्ती मोटार घेऊन फिर्यादी महिलेला सोडायला आला असता, अनेक महिलांनी फिर्यादी महिलेच्या मोटारीला घेराव घातला. फिर्यादी महिला तक्रार देण्यासाठी चिंचवड पोलीस ठाण्यात गेली असता दोन महिलांनी त्यांना मारहाण आणि शिवीगाळ केली. पोलीस उपनिरीक्षक सुजाता पाटील तपास करत आहेत.
घटना घडली तेव्हा मी तिथे नव्हतो. मी कोणालाही धमकी दिली नाही. माझ्यावरील आरोप खोटे आहेत. मला बदनाम करण्यासाठी गुन्हा दाखल केला असल्याचे भाजयुमोचे प्रदेशाध्यक्ष अनुप मोरे म्हणाले.
