कोंडी, खंडित वीजपुरवठ्याचा ‘ई-शिवनेरी’ला फटका; चार्जिंगअभावी पुणे-मुंबई मार्गावरील प्रवासाचे वेळापत्रक कोलमडले

पुणे एसटी महामंडळाच्या स्वारगेट आणि स्टेशन आगारातून दररोज पहाटे पाचपासून रात्री उशिरापर्यंत दादर, बोरिवली, ठाणे या मार्गावर दर तासाने ‘ई शिवनेरी’ सोडली जाते. तितक्याच बस दादर आणि मुंबई एसटी आगारातून पुणे मार्गावर धावतात. दिवसभरात जवळपास ५० हून अधिक ‘ई शिवनेरी’ची सेवा सुरू असते. पुणे-मुंबई प्रवास करणाऱ्या प्रवाशांना आरामदायी सुविधा मिळावी, प्रवास सुकर होण्यासाठी सर्वाधिक ई शिवनेरी बस या मार्गावर सोडण्यात येतात. या सेवेला प्रवाशांचा प्रतिसादही चांगला आहे.

‘ई-शिवाई आणि ई शिवनेरी या बस पुण्यातील शंकरशेठ रस्त्यावरील चार्जिंग स्थानकात चार्ज केल्या जातात. लोणावळा येथील घाट परिसर, वळणावळणाचे रस्ते, पुणे-मुंबई द्रुतगती महामार्गावर लागणाऱ्या वाहनांच्या रांगा यामुळे या बस वाहतूक कोंडीत अडकून पडतात. त्यामुळे मोठ्या प्रमाणात ऊर्जा खर्च होते. त्यामुळे शेवटच्या स्थानकात पोहोचण्यास विलंब होतो,’ असे ‘ई शिवनेरी’ चालकांकडून सांगण्यात आले.

खंडित विद्युत पुरवठ्यामुळे एसटी सेवा विस्कळीत

पुणे एसटी महामंडळाचे स्वारगेट आणि शंकरशेठ रस्त्यावरील विभाग नियंत्रक कार्यालयात इलेक्ट्रिक वाहन चार्जिंग स्थानक आहे. एक एसटी पूर्ण चार्ज होण्यासाठी दोन तासांचा कालावधी द्यावा वागतो. हे ध्यानात घेऊन या एसटीचे त्यानुसार वेळापत्रक निश्चित केले आहे. मात्र, गेल्या आठवडाभरापासून या परिसरात सातत्याने वीजपुरवठा खंडित होत आहे. वीजवितरण व्यवस्थेत समस्या येत असल्याचा परिणाम बस चार्जिंगवर होत असून, वेळापत्रकही कोलमडले आहे.

मुंबई-द्रुतगती महामार्गावर वाहतुकीची मंदावलेली गती, इतर ठिकाणी होणारी वाहतूक कोंडी आणि चार्जिंग स्थानकातील खंडित होणारा विद्युत पुरवठा यामुळे ई-शिवनेरी, शिवाई या बसच्या चार्जिंगसाठी वेळ लागत आहे. वेळापत्रकावर परिणाम होत असल्याने प्रवाशांच्या तक्रारी वाढल्या आहेत. – अरुण सिया, विभागीय नियंत्रक, एसटी महामंडळ