पिंपरीत नालेसफाईचे काम संथगतीने

पावसाळ्यात पूरस्थिती निर्माण होऊ नये यासाठी महापालिका आरोग्य विभागाच्या वतीने नालेसफाईचे काम हाती घेतले आहे. मात्र, हे काम संथगतीने सुरू असून सद्य:स्थितीत केवळ ३० टक्के काम पूर्ण झाले आहे.

पिंपरी महापालिका (फोटो सौजन्य- संग्रहित छायाचित्र)

पिंपरी : पावसाळ्यात पूरस्थिती निर्माण होऊ नये यासाठी महापालिका आरोग्य विभागाच्या वतीने नालेसफाईचे काम हाती घेतले आहे. मात्र, हे काम संथगतीने सुरू असून सद्य:स्थितीत केवळ ३० टक्के काम पूर्ण झाले आहे. त्यामुळे ३१ मे पर्यंत काम पूर्ण करण्याचे आव्हान आरोग्य विभागासमोर असणार आहे.

पिंपरी-चिंचवड शहर परिसरात लहान – मोठे मिळून १४८ नाले आहेत. त्यामध्ये ‘अ’ प्रभाग हद्दीत २५, ‘ब’ १५, ‘क’ २९, ‘ड’ १२, ‘इ’ १६, ‘फ’ १९, ‘ग’ १२ आणि ‘ह’ प्रभागात २० नाले आहेत. शहरातील नाल्यांची लांबी एक लाख एक हजार ९२० मीटर तर रुंदी ७३९ मीटर आहे. ‘क’ प्रभागातील जाधववाडी मातोश्री कमान, वडाचा मळा, क्रिस्टल सिटी गृहनिर्माण सोसायटी ते ऐश्वर्यएम हमारा सोसायटीपर्यंतच्या नाल्याची सर्वाधिक म्हणजेच तीन हजार ८०० मीटर लांबी आहे. तर, ‘ग’ प्रभागातील सज्जनगड सोसायटी ते पवना नदी या नाल्याची सर्वात कमी ९.७२ मीटर लांबी आहे.

हेही वाचा >>>“राष्ट्रवादीचे खासदार अमोल कोल्हे भाजपात आले, तर…”, शिंदे गटाचे नेते शिवाजीराव आढळरावांचं सूचक वक्तव्य

पावसाचे पाणी रस्त्यावर साचू नये आणि नागरिकांचे आरोग्य धोक्यात येऊ नये, यासाठी महापालिकेच्या आरोग्य विभागाने एप्रिल महिन्यापासून नाले साफसफाईचे काम हाती घेतले आहे.महापालिकेच्या आठ क्षेत्रीय कार्यालय हद्दीत १४८ नाले आहेत. सर्व नाल्यांच्या सफाईचे काम सुरू आहे. सद्य:स्थितीत ३० टक्के काम पूर्ण झाले आहे. ३१ मे पर्यंत नालेसफाईचे काम पूर्ण करण्यात येणार आहे.-गणेश देशपांडे,आरोग्य कार्यकारी अधिकारी,पिंपरी-चिंचवड महापालिका