लोकसत्ता प्रतिनिधी पुणे: ब्रेक निकामी झालेल्या कंटेनरची शाळकरी मुलांची वाहतूक करणाऱ्या बससह तब्बल आठ वाहनांना धडक बसली. या विचित्र अपघातात मोटरसायकलस्वार प्रशांत कृष्णा चौरे (वय ४३, रा. धनकवडी) हे ठार झाले आहेत. कात्रज-कोंढवा रस्त्यावरील खडीमशीन चौकात कोंढवा स्मशानभूमीजवळ गुरुवारी सकाळी हा विचित्र अपघात झाला. कात्रज कोंढवा रस्त्यावर खडीमशीनच्या दिशेने सिमेंटचे पाईप घेऊन जाणाऱ्या कंटेनरचे ब्रेक निकामी झाले. चालकाला वाहन नियंत्रित न करता आल्याने कंटेनरची पुढे जात असलेल्या आठ वाहनांना धडक दिली. या अपघातात मोटारसायकलस्वाराचा मृत्यू झाला असून पाचजण जखमी आहेत. तसेच अन्य वाहनांचे नुकसान झाले आहे. आणखी वाचा-पिंपरी-चिंचवडमध्ये संभाजी भिडे यांच्यावर गुन्हा दाखल करावा या मागणीसाठी मोर्चा! पोलिसांनी अडवला मोर्चा कंटेनरच्या पुढे असणाऱ्या वाहनांमध्ये शाळकरी मुलांची वाहतूक करणारी बस होती. सुदैवाने या बसमधील विद्यार्थी सुरक्षित आहेत. तर चालक किरकोळ जखमी झाला आहे.
