पु. ल. देशपांडे यांच्या २५ व्या स्मृतिदिनानिमित्त ‘ग्लोबल पुलोत्सव’

‘या महोत्सवात बालगंधर्व रंगमंदिर, बालगंधर्व कलादालन आणि झपुर्झा येथे सांस्कृतिक कार्यक्रम, परिसंवाद, चर्चासत्र, लघुपट आणि व्यंगचित्र प्रदर्शन अशा विविध उपक्रमांची रेलचेल असणार आहे,’ अशी माहिती ‘ग्लोबल पुलोत्सव’चे स्वागताध्यक्ष कृष्णकुमार गोयल यांनी शनिवारी पत्रकार परिषदेत दिली. अजित गाडगीळ, वीरेंद्र चित्राव आणि सतीश जकातदार या वेळी उपस्थित होते.

व्यंगचित्र प्रदर्शनाचे उद्घाटन गुरुवारी (६ नोव्हेंबर) ज्येष्ठ नाटककार सतीश आळेकर यांच्या हस्ते होणार आहे. तसेच, ‘या सम हा’ हा लघुपट दाखवला जाईल. ‘काळापुढचे पुलं’ या विषयावर विजय केंकरे, श्रीरंग गोडबोले यांच्याशी शुक्रवारी (७ नोव्हेंबर) परिसंवाद, तर शनिवारी (८ नोव्हेंबर) ‘आस्वादक पुलं’ या विषयावर कौशल इनामदार, भानू काळे यांच्याबरोबर परिसंवाद होईल. शुक्रवार-शनिवार याच दोन दिवसांत ‘झपुर्झा’त ‘रंगरेषांच्या सान्निध्यात’ ही कार्यशाळा, पद्मश्री अच्युत पालव यांच्याशी संवाद आणि ‘जलरंग’ कार्यशाळा होणार आहे.

समारोपावेळी पंडित अजय चक्रवर्ती यांना ज्येष्ठ शास्त्रज्ञ डॉ. रघुनाथ माशेलकर यांच्या हस्ते ‘पु. ल. स्मृती सन्मान’ प्रदान करण्यात येणार आहे. कार्यक्रम विनामूल्य असून, मंगळवारपासून (४ नोव्हेंबर) बालगंधर्व रंगमंदिर येथील आरक्षण खिडकीत प्रवेशिका उपलब्ध असतील, असे गोयल यांनी नमूद केले.