पुणे : कोंढव्यात तरुणावर पिस्तुलातून गोळ्या झाडून त्याचा खून करण्यात आल्याची घटना शनिवारी दुपारी घडली. प्राथमिक तपासात तरुणाचा खून टोळीयुद्धातून झाल्याची शक्यता पोलिसांनी व्यक्त केली आहे.
गणेश काळे असे खून झालेल्या तरुणाचे नाव आहे. कोंढवा परिसरातून गणेश काळे शनिवारी दुपारी निघाला होता. त्यावेळी दुचाकीवरुन आलेल्या हल्लेखोरांनी त्याला अडवून त्याच्यावर पिस्तुलातून गोळ्या झाडल्या. गोळीबाराची माहिती मिळताच कोंढवा पोलिसांनी घटनास्थळी धाव घेतली. गंभीर जखमी झालेल्या काळेला तातडीने रुग्णालयात दाखल करण्यात आले. उपचारांपूर्वीच त्याचा मृत्यू झाल्याची माहिती पोलिसांनी दिली.
पोलिसांनी पसार झालेल्या हल्लेखोरांचा शोध घेण्यासाठी पथके रवाना केली आहे. गणेश काळे हा खून प्रकरणातील एका आरोपीचा भाऊ असल्याची माहिती मिळाली आहे. त्याचा खून टोळीयुद्धातून झाल्याची शक्यता पोलिसांनी व्यक्त केली आहे.
शहरात गेल्या काही दिवसांपासून गुन्हेगारी घटनांमध्ये वाढ झाली आहे. गणेश विसर्जनाच्या पूर्वसंध्येला नाना पेठेतील टोळीयुद्धातून आंदेकर टोळीने आयुष कोमकर याच्यावर गोळीबार केला होता. गोळीबारात आयुषचा जागीच मृत्यू झाला होता. या घटनेनंतर नीलेश घायवळ टोळीतील सराइतांनी कोथरूडमधील शास्त्रीनगर परिसरात एका तरुणावर गोळीबार केला होता, तसेच या भागात थांबलेल्या एका तरुणावर कोयत्याने वार करून दहशत माजविली.
