पुणे: रक्तपुरवठा बंद पडल्याने हाडांच्या पेशी निकामी होऊन अव्हॅस्क्युलर नेक्रॉसिस हा विकार होतो. या विकाराने एक तरुणी ग्रस्त होती. अनेक वेळा उपचार घेऊनही तिच्या वेदना कमी होत नव्हत्या. त्यामुळे मणक्याला भूल देऊन तिच्यावर नावीन्यपूर्ण पद्धतीने शस्त्रक्रिया करण्यात आली. अखेर तिच्या प्रकृतीत सुधारणा झाली आहे. या तरुणीला खुब्यात तीव्र वेदना होत होत्या. तिला रुबी हॉल क्लिनिकमध्ये दाखल करण्यात आले. रेडिओलॉजिकल तपासण्यांमधून अव्हॅस्क्युलर नेक्रॉसिस विकाराचे निदान झाले. तिच्या मणक्यात भूल देऊन व एक्स-रेच्या मार्गदर्शनाखाली शस्त्रक्रिया करण्यात आली. शस्त्रक्रियेनंतर तरुणीच्या वेदना कमी होऊन तिला आराम मिळाला. ही प्रक्रिया करत असताना नावीन्यपूर्ण तंत्राचा वापर करण्यात आला. या नावीन्यपूर्ण तंत्रांतर्गत १० मिलिमीटर डिकम्प्रेशन ब्लेडचा वापर करण्यात आला. त्यामुळे निकामी झालेल्या पेशी अचूकतेने काढण्यात यश आले. हेही वाचा >>>महागलेल्या लिंबांच्या दरात अचानक घसरण का झाली? या प्रक्रियेमुळे तरुणीच्या निरोगी हाडांच्या पेशींना धक्का न लावता बाधित झालेली जागा साफ करता आली. तिच्या मानेतून हाडाचा तुकडा या साफ केलेल्या बाधित जागेत बसविण्यात आला. त्यानंतर पेशींच्या पुनर्निर्मितीसाठी बोनमॅरो ॲस्पिरेट कॉन्सन्ट्रेट (बीएमएसी) हे इंजेक्शन देण्यात आले. या तरुणीला दोन दिवसांच्या देखभालीनंतर घरी सोडण्यात आले. पायावर जास्त भार न देता वॉकरचा वापर करण्याची सूचना तिला सुरुवातीला देण्यात आली. या प्रक्रियेत वापरले जाणारे स्वयंशोषक टाके हे दोन आठवड्यांत आपोआप पडले आणि हळूहळू तरुणीला आपले दैनंदिन कार्य सुरू करता आले. रुग्णाच्या मानेतील हाडाचा तुकडा काढून निकामी झालेल्या पेशींच्या जागी बसवून पोकळी भरून काढणे आव्हानात्मक होते. यामुळे हाडांची योग्य पुनर्निर्मिती आणि संरचनात्मक अखंडता सुनिश्चित झाली.- डॉ. किरण खरात, रुबी हॉल क्लिनिक
