पुणे : दुचाकीवरुन ट्रिपल सीट निघालेल्या तिघांना भरधाव ट्रकने धडक दिल्याची घटना पुणे-सोलापूर रस्त्यावरील वानवडी भागात घडली. अपघातात दुचाकीवरील सहप्रवाशाचा मृत्यू झाला असून, दुचाकीस्वारासह दोघे जण जखमी झाले.
रितेशकुमार महिंदरसिंग (वय २७, रा. लोहदरदुर्ग, झारखंड) असे मृत्युमुखी पडलेल्याचे नाव आहे. अपघातात दुचाकीस्वार शूभम ज्ञानेश्वर इंगळे (वय २७, रा. थिटे वस्ती, खराडी), सहप्रवासी रवी चौरसिया जखमी झाले आहेत. याबाबत पोलीस हवालदार सचिन घोडके यांनी वानवडी पोलीस ठाण्यात फिर्याद दिली आहे.
धोकादायक पद्धतीने दुचाकी चालविल्याप्रकरणी दुचाकीस्वार शुभम इंगळे, तसेच ट्रकचालकाविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, दुचाकीस्वार शुभम इंगळे, रितेशकुमार, रवी चौरसिया हे ट्रिपल सीट निघाले होते. २ जून रोजी दुपारी पुणे-सोलापूर रस्त्यावरील वानवडीतील क्रोमा शोरुम चौकात भरधाव ट्रकने दुचाकीला धडक दिली. अपघातात रितेशकुमार, चौरसिया यांना गंभीर दुखापत झाली. उपचारादरम्यान रितेशकुमार याचा रुग्णालयात नुकताच मृत्यू झाला. त्यानंतर पोलिसांनी याप्रकरणी गुन्हा दाखल केला.
दुचाकीस्वार इंगळे याने धोकादायक पद्धतीने दुचाकी चालवून अपघातास जबाबदार ठरल्याप्रकरणी त्याच्यासह ट्रकचालकाविरुद्ध गु्न्हा दाखल करण्यात आला. पोलीस उपनिरीक्षक लोंढे तपास करत आहेत.
