पुणे : दिवंगत आमदार लक्ष्मण जगताप यांचे रक्त आमच्यात आहे. त्यामुळे, आमचा विजय निश्चित होईल. अद्याप आम्ही दुःखातून सावरलेलो नाहीत. आई अश्विनी जगताप यांनी नेहमीच वडिलांना पडद्यामागे राहून पाठिंबा दिला. आज त्यांची उणीव भासते आहे. वडिलांवर जनतेने भरभरून प्रेम केले, तसेच आमच्यावर करा, असे भावनिक आवाहन दिवंगत आमदार लक्ष्मण जगताप यांच्या कन्या ऐश्वर्या रेणुसे (जगताप) यांनी केले आहे. आज अश्विनी जगताप यांचा उमेदवारी अर्ज भरण्यात येणार आहे. कन्या, ऐश्वर्या या अश्विनी जगताप यांच्या सोबत असून, त्यांच्या हातात दिवंगत आमदारांचा फोटो आहे.
भाजपाचे दिवंगत आमदार लक्ष्मण जगताप यांचे निधन झाल्याने चिंचवड विधानसभा पोटनिवडणूक लागली आहे. भाजपाकडून अश्विनी जगताप यांना उमेदवारी देण्यात आली असून, पदयात्रेद्वारे शक्ती प्रदर्शन करत त्या आज उमेदवारी अर्ज भरणार आहेत. यावेळी दिवंगत लक्ष्मण जगताप यांच्या कन्या ऐश्वर्या म्हणाल्या की, दुःखातुन आम्ही अद्याप सावरलेलो नाही. गेली तीस वर्षे आईने पडद्यामागे राहून वडिलांना पाठिंबा दिला. यामुळे आमचा विजय नक्की होईल, असे वाटते. वडिलांनी ज्या प्रकारे जनतेवर प्रेम केले तसेच प्रेम आमच्यावर करा, असे भावनिक आवाहन त्यांनी नागरिकांना केले आहे.
हेही वाचा – “वेळ आहे, उमेदवार बदलता येईल”, चंद्रशेखर बावनकुळे यांचे सूचक विधान
हेही वाचा – “:…म्हणून कसबा पोटनिवडणुकीत भाजपचं ओबीसी समीकरण”, रोहित पवारांचा टोला
ऐश्वर्या या त्यांच्या आई अश्विनी जगताप यांच्यासोबत पदयात्रेत सहभागी झाल्या असून, त्यांच्या हातात दिवंगत आमदार लक्ष्मण जगताप यांचा फोटो असल्याचे पाहायला मिळत आहे. या पदयात्रेत पुण्याचे पालकमंत्री चंद्रकांत पाटील हे देखील सहभागी झाले आहेत.
