महावितरण, एमएनजीएलची खोदाई पुण्यात बंद

महापालिकेच्या पथ विभागाच्या वतीने दर वर्षी विविध कामे करण्यासाठी रस्तेखोदाईची परवानगी दिली जाते. ही परवानगी देताना आवश्यक ते शुल्क घेतले जाते. खासगी मोबाईल कंपन्या, महावितरण, एमएनजीएल याबरोबरच महापालिकेच्या पाणीपुरवठा, मलनि:सारण विभागाला विविध कामांसाठी ही परवानगी दिली जाते. ती ३१ मेपर्यंत असते. मात्र, यंदा महापालिकेने परवानगी १५ मे पर्यंत दिली होती. ही मुदत गुरुवारी संपल्याने महापालिकेने महावितरण तसेच एमएनजीएल कंपन्यांना पत्र पाठवून परवानगी संपल्याचे कळविल्याचे पावसकर यांनी सांगितले.

परवानगी संपल्याने आता या दोन्ही कंपन्यांना शहरातील कोणत्याही भागांत रस्ते खोदाई करता येणार नाही. महापालिकेच्या पत्राकडे दुर्लक्ष करून खोदाई केल्यास संबंधितांवर कारवाई करण्याचा इशारा महापालिकेने दिला आहे. रस्ते खोदाईची परवानगी संपल्याने ३१ मे पर्यंत खोदलेले हे सर्व रस्ते दुरुस्त करण्याचे काम पथ विभागाच्या वतीने पूर्ण केले जाणार असल्याचे पथ विभागाने स्पष्ट केले.

पोलिसांना ३१ मेपर्यंत मुदतशहराच्या सुरक्षेसाठी पुणे पोलिसांकडून विविध ठिकाणी १२०० सीसीटीव्ही कॅमेरे बसविले जाणार आहेत. यासाठी महापालिकेने रस्तेखोदाईची परवानगी दिली होती. या प्रकल्पासाठी खोदले जाणारे रस्ते दुरुस्त करण्याचे काम संबंधित ठेकेदार करणार असल्याने पोलिसांना ३१ मेपर्यंत रस्तेखोदाई आणि दुरुस्तीची मुदत असणार आहे. तसेच, महापालिकेच्या समान पाणी योजना, आपत्ती व्यवस्थापन कक्षासाठी ओएफसी केबल टाकण्याच्या कामासाठी ३१ मेपर्यंत मुदत असणार आहे. त्यानंतर या विभागांनाही कोणतीही खोदाई करता येणार नाही. १ ऑक्टोबरनंतरच त्यांना खोदाईसाठी परवानगी दिली जाणार असल्याचे अनिरुद्ध पावसकर यांनी सांगितले.

पावसाळा सुरू होण्यापूर्वी शहरातील खोदलेले रस्ते पूर्ववत करण्याची जबाबदारी पथ विभागाची असते. यंदाच्या वर्षी १५ मेपर्यंत परवानगी देण्यात आली होती. आता पुढील १५ दिवसांत रस्ते दुरुस्तीची कामे पूर्ण केली जातील. – अनिरुद्ध पावसकर, पथ विभागप्रमुख, पुणे महापालिका