पिंपरी : पिंपरी-चिंचवड महापालिकेच्या अंतिम प्रभागरचना मंजुरीच्या प्रतीक्षेत असून, साेमवारी मंजुरी मिळण्याची शक्यता आहे. त्यानंतर प्रभागरचनेमध्ये बदल करण्यात आला आहे की नाही हे स्पष्ट हाेणार आहे. त्यामुळे इच्छुकांचे अंतिम प्रभागरचनेकडे लक्ष लागले आहे.पिंपरी-चिंचवड महापालिकेची आगामी सार्वत्रिक निवडणूक ही २०१७ च्या प्रभागरचनेप्रमाणेच हाेणार असून १२८ नगरसेवक संख्या कायम आहे. त्यानुसार महापालिकेने २२ ऑगस्टला चार सदस्यीय पद्धतीने ३२ प्रभागांची प्रारूप रचना प्रसिद्ध केली.
प्रभागरचनेवर ३१८ हरकती, सूचना आल्या हाेत्या. या हरकतींवर राज्याचे सहकार आणि विपणन विभागाचे प्रधान प्रवीण दराडे यांनी दहा सप्टेंबर रोजी एकाच दिवशी सुनावणी घेतली. हरकती व सूचनांवरील शिफारशी विचारात घेऊन प्राधिकृत अधिकाऱ्यांनी प्रभाग रचना अंतिम केली. ही अंतिम रचना महापालिका आयुक्त शेखर सिंह यांनी १५ सप्टेंबर रोजी नगरविकास विभागाला सादर केली. अंतिम प्रभाग रचना राज्य शासनाकडून राज्य निवडणूक आयोगाला सादर केली. आयोगाच्या मान्यतेनंतर तीन ते सहा ऑक्टोबरदरम्यान अंतिम प्रभागरचना प्रसिद्ध करण्याचे वेळापत्रक निश्चित करण्यात आले आहे. मात्र, अद्याप अंतिम रचनेला मंजुरी देण्यात आलेली नाही. त्यामुळे सोमवारी मंजुरी मिळण्याची शक्यता आहे.
महापालिकेच्या प्रभागरचनेला अद्याप निवडणूक आयाेगाची मंजुरी मिळालेली नाही. साेमवारी मंजुरीची शक्यता आहे. आयाेगाची मंजुरी मिळताच अंतिम प्रभागरचनेची अधिसूचना (गॅझेट) प्रसिद्ध केले जाईल. अविनाश शिंदे, सहायक आयुक्त, निवडणूक विभाग,पिंपरी-चिंचवड महापालिका
