पिंपरी : पिंपरी-चिंचवड शहर पोलीस दलात शिपाई पदाच्या ३२२ जागांची भरती केली जाणार आहे. त्यासाठी ऑनलाइन माध्यमातून अर्ज स्वीकारण्यास सुरुवात झाली आहे. ३० नोव्हेंबरपर्यंत भरतीसाठीचे अर्ज स्वीकारले जाणार आहेत.
पिंपरी-चिंचवड शहर पोलीस भरतीमध्ये सर्वसाधारण उमेदवारांसाठी ९७ पदे, महिला ९७ पदे, खेळाडू १६ पदे, प्रकल्पग्रस्त १६ पदे, भूकंपग्रस्त सहा पदे, माजी सैनिक ४८ पदे, अंशकालीन पदवीधर १६ पदे, पोलीस पाल्य १० पदे, गृहरक्षक दल १६ पदे भरली जाणार आहेत. उमेदवारांना अर्ज करण्यासाठी महाराष्ट्र पोलिसांच्या policerecruitment2025.mahait.org या संकेतस्थळावर माहिती उपलब्ध करून देण्यात आली आहे. राज्यातील सर्व पोलीस घटकांमध्ये लेखी परीक्षा एकाच दिवशी आयोजित केली जाणार असल्याने उमेदवार संपूर्ण महाराष्ट्रात फक्त एका घटकातच अर्ज करू शकतो. उमेदवाराने चुकीची माहिती दिल्यास उमेदवारी कोणत्याही टप्प्यावर रद्द होईल.
भरती प्रक्रियेत प्रथम शारीरिक चाचणी घेण्यात येईल. त्यामध्ये किमान ५० टक्के गुण मिळवणाऱ्या उमेदवारांमधून १:१० प्रमाणात उमेदवारांची शंभर गुणांची लेखी परीक्षा घेण्यात येईल. उमेदवारांनी लेखी परीक्षेत किमान ४० टक्के गुण मिळवणे आवश्यक आहे. ४० टक्क्यांहून कमी गुण मिळवणारे उमेदवार अपात्र समजले जातील. शारीरिक आणि लेखी चाचणी मधील गुणांच्या आधारे उमेदवारांची एक गुणवत्ता यादी तयार केली जाईल. त्या उमेदवारांची मूळ कागदपत्रे पडताळणी केली जाईल. कागदपत्र पडताळणी मध्ये पात्र ठरलेल्या उमेदवारांची तात्पुरती निवड यादी तयार केली जाईल. त्यानंतर अंतिम गुणवत्ता यादी तयार केली जाईल. पोलीस भरतीच्या अर्जासाठी उमेदवार दहावी किंवा बारावी उत्तीर्ण असणे आवश्यक आहे. १८ ते २८ वर्ष वयोगटातील उमेदवारांना अर्ज करता येईल.
पोलीस भरती करण्याबाबत कोणीही पैशांची अथवा इतर कोणत्याही स्वरूपाची मागणी केल्यास संबंधित उमेदवारांनी लाचलुचपत प्रतिबंधक विभागाकडे तक्रार करावी. इतर अडचण असल्यास पोलीस भरती समितीचे अध्यक्ष तथा पोलीस आयुक्त यांच्याकडे तक्रार करावी, असे पिंपरी-चिंचवड पोलीस आयुक्तालयाच्या उपायुक्त तथा अध्यक्ष, पोलीस भरती समितीच्या अध्यक्षा श्वेता खेडकर यांनी सांगितले.
