मित्राला वाचवायला गेलेल्याचा मृत्यू, वाचलेल्या तरुणाने आत्महत्येचा बनाव रचल्याचे तपासात उघड

मृत तरुणाच्या वडिलांनी रावेत पोलीस ठाण्यात फिर्याद दिली आहे. त्यानुसार मृत तरुणाच्या मित्राविरोधात गुन्हा दाखल करण्यात आला आहे. पोलिसांनी दिलेल्या माहितीनुसार, मैत्रिणीवरून आणि भागीदारीत असलेल्या कॅफेच्या आर्थिक कारणावरून मृत तरुणाचे त्याच्या मित्राबरोबर वाद झाले होते. त्यावरून मित्राने रेल्वेखाली उडी मारून आत्महत्या करण्याची धमकी दिली. तो रावेत येथे आकुर्डी रेल्वे स्थानकाजवळील लोहमार्गावर गेला. मित्र आत्महत्या करत असल्याने त्याला वाचवण्यासाठी तरुणही गेला. मित्र लोहमार्गावर असताना, त्याला बाजूला करण्यासाठी तरुणदेखील लोहमार्गावरून जात होता. याच वेळी रेल्वे आली असता मित्र ट्रॅकवरून बाजूला झाला आणि तरुण रेल्वेखाली चिरडला गेला. जखमी तरुणाला रुग्णालयात उपचारासाठी दाखल न करता मित्र पळून गेला. यामध्ये तरुणाचा मृत्यू झाला. फौजदार राहुल खिळे तपास करीत आहेत.