पिंपरी शहरातून वाहणाऱ्या पवना, इंद्रायणी व मुळा नदी पात्रामध्ये राडारोडा आणि मातीचा भराव टाकण्याचे प्रकार शहरात सर्रासपणे सुरू आहेत. त्यामुळे नदी पात्र अरूंद होत आहेत. राडारोडा टाकणारी सहा ट्रक व टेम्पो महापालिकेच्या पर्यावरण अभियांत्रिकी विभागाने जप्त केले. त्यांच्याकडून ६५ हजारांचा दंड वसूल करण्यात आला आहे. शहरातून वाहणार्‍या तीनही नदी पात्रात राडारोडा व मातीचा भराव टाकून सपाटीकरण केले जाते. तेथे अनधिकृत बांधकाम किंवा पत्राशेड बांधून ते भांड्याने देणे किंवा विकले जात असल्याचे प्रकार समोर आले आहेत. मात्र, या प्रकाराकडे महापालिकेकडून जाणीवपूर्वक दुर्लक्ष केले जाते. त्यामुळे नदीकाठी राडारोडा टाकण्याचे प्रकार सर्वत्र वाढले आहेत. हेही वाचा.बारामती, पिंपरी-चिंचवडमधील कुणबी नोंदीचे गूढ तक्रार केल्यानंतर महापालिकेचा क्षेत्रीय कार्यालय तसेच, पर्यावरण अभियांत्रिकी विभाग जागे झाल्याचे ढोंग करीत कारवाई करते. कारवाईनंतर पुन्हा जैसे थे परिस्थिती सुरू होते.या लोकांवर कायमस्वरूपी कारवाई करून त्यांना निर्बंध लादण्याची मागणी पर्यावरणप्रेमींकडून केली जात आहे. पिंपळे गुरव येथील मोरया पार्क, कृष्णराज कॉलनी, अमृता कॉलनी, भाऊ नगर, मुक्तांगण लॉन्स, देवकर पार्क, शिवनेरी कॉलनी या भागांतून दररोज ट्रक, ट्रक्टर, डम्पर, टेम्पोतून राडारोडा नदी काठी टाकला जात आहे. त्या बाबतची तक्रार पर्यावरण विभागास प्राप्त झाली. त्यानंतर पर्यावरण विभागाने प्रत्यक्ष पाहणी करून त्या वाहनचालकांवर कारवाई केली. हेही वाचा.पिंपरी-चिंचवड शहरात गुरुवारी पाणीपुरवठा बंद, कारण… नदी पात्रात भराव टाकणारे नितीन दर्शिले यांच्या मालकीचे चार वाहने जप्त करण्यात आली आहेत. दामोदर तळीमट्टी यांचा ट्रॅक्टर, नागनाथ मंजुळे यांचा एक टेम्पो, लकाप्पा पुजारी यांचा एक टेम्पो अशी सात वाहने महापालिकेने जप्त केली आहेत. या वाहनमालकांकडून एकूण ६५ हजार रुपये दंड वसूल करण्यात आला आहे. पर्यावरण अभियांत्रिकी विभागाचे सहशहर अभियंता संजय कुलकर्णी यांच्या मार्गदर्शनाखाली आरोग्य निरीक्षक अमोल गोरखे, मल्टिपर्पज वर्कर गोरक्षनाथ करपे यांनी ही कारवाई केली. त्यासाठी पर्यावरण पथक, एमएसएफच्या जवानांची मदत घेण्यात आली..
