पुणे : खडकवासला धरणातून १० हजार क्युसेकने विसर्ग; धरणक्षेत्रात पाऊस कायम

चारही धरणांच्या पाणलोट क्षेत्रात मंगळवारी रात्रीपासून बुधवारी सकाळपर्यंत जोरदार पावसाने हजेरी लावली. मंगळवारी रात्रीपासून बुधवारी सकाळपर्यंत टेमघर धरण क्षेत्रात १६० मिलिमीटर, वरसगाव धरण परिसरात ८८ मि.मी, पानशेत धरण परिसरात ९३ मि.मी, तर खडकवासला धरण क्षेत्रात ३८ मि.मी पावसाची नोंद झाली आहे. सध्या खडकवासला धरणसाखळी प्रकल्पात १२.२३ टीएमसी पाणीसाठा जमा झाला आहे. मंगळवारी रात्री चारही धरणांत ११.५७ टीएमसी पाणीसाठा होता. मंगळवारी रात्रीच्या तुलनेत बुधवारी सकाळी तब्बल ०.६६ टीएमसीने पाणीसाठ्यात वाढ झाली आहे, असे जलसंपदा विभागाकडून सांगण्यात आले.

दरम्यान, मंगळवारच्या तुलनेत खडकवासला धरण परिसरात थोडा पाऊस कमी झाल्याने या धरणातून मुठा नदीत सुरू असलेला १३ हजार १४२ क्युसेकच्या निसर्गात बुधवारी सकाळी २८९६ क्युसेकने कमी करण्यात आला आहे, असे जलसंपदा विभागाकडून सांगण्यात आले.

प्रमुख धरणांमधील पाणीसाठा टीएमसी, टक्क्यांत –

टेमघर                   १.०३      २७.६७
वरसगाव               ४.९६      ३८.६७
पानशेत                 ४.३६      ४०.९७
खडकवासला        १.८८       ९५.५१
एकूण                  १२.२३    ४१.९६