आयुक्तांकडून प्रशासनाची स्वच्छता सुरू, तडकाफडकी बदली, थेट निलंबित तर काहींना कारणे दाखवा नोटीस..!

गेल्या आठवड्यात नगर रोड वडगाव शेरी भागातील बेकायदा जाहिरात फलकांची चुकीची माहिती देत महापालिकेची दिशाभूल करण्याचा प्रयत्न करणाऱ्या आकाश चिन्ह विभागातील एका कर्मचाऱ्यावर निलंबनाची तर दुसऱ्या एका अधिकाऱ्याला कारणे दाखवा नोटीस देत खुलासा करण्यास सांगितले होते. नागरिकांच्या तक्रारींचे निवारण न करणाऱ्या कर्मचारी अधिकाऱ्यांची गय केली जाणार नाही, असा इशारा महापालिका आयुक्त नवल किशोर राम यांनी विभाग प्रमुखांचा अधिकारी आणि कर्मचाऱ्यांना दिला आहे.

क्षेत्रीय कार्यालयाच्या स्तरावर नागरिकांच्या प्रश्नांकडे दुर्लक्ष केले जात असल्याने प्रश्न सोडवण्यासाठी नागरिक महापालिकेच्या मुख्य इमारतीत येऊन आपले गाऱ्हाणे मांडतात. तर काही नागरिक महापालिकेचे अतिरिक्त आयुक्त तसेच आयुक्तांची देखील भेट घेऊन तक्रार करतात. यामध्ये नागरिकांना मनस्ताप सहन करावा लागतो. तक्रार घेऊन येणाऱ्या नागरिकांच्या कामाची दखल घेत त्यावर तातडीने कार्यवाही करावी अशा सूचना महापालिका प्रशासनाने सर्व विभाग प्रमुख अधिकाऱ्यांना दिले आहे. मात्र त्यानंतरही त्याकडे जाणीवपूर्वक दुर्लक्ष करणाऱ्यांवर कारवाईचा बडगा उगारण्यात आला आहे.

महापालिकेच्या मलनिस्सारण विभागाच्या कामात बदल होत नसल्याने या विभागाचे अधीक्षक अभियंता संतोष तांदळे यांची महापालिका आयुक्तांनी तडकाफडकी बदली केली. कामानिमित्त येणाऱ्या नागरिकांच्या तक्रारी तातडीने सोडविण्याच्या सूचना राम यांनी दिल्या आहेत. नागरिकांना हेलपाटे मारायला लागल्यास संबंधित अधिकारी, कर्मचारी यांच्यावर कारवाईचा इशारा आयुक्तांनी दिला होता. त्यानुसार त्याची अंमलबजावणीदेखील सुरू करण्यात आली आहे.

महापालिकेचा मलनिस्सारण हा महत्त्वाचा विभाग आहे. या विभागाच्या कामाबाबत शहरातील विविध भागांतून वारंवार तक्रारी येतात. त्याची दखल घेऊन आलेल्या तक्रारींचे निवारण करण्याचा आदेश यापूर्वी महापालिका आयुक्तांनी दिला होता. तसेच, कामकाजामध्ये तातडीने सुधारणा करण्यास बजाविले होते. मात्र, वारंवार सूचना करूनही बदल झाला नाही. त्यामुळे महापालिका आयुक्तांनी तांदळे यांची बदली केली. त्यांना पाणीपुरवठा विभागात पाठविण्यात आले आहे.

मलनिस्सारण विभागांतर्गत देखभाल-दुरुस्तीचा झोन ३, ४ आणि ५ चा पदभार तांदळे यांच्याकडे होता. आयुक्तपदाची जबाबदारी घेतल्यानंतर राम यांनी मलनिस्सारण विभागाचा आढावा घेतला. त्यामध्ये त्यांना या विभागाचे कामकाज समाधानकारक नसल्याचे आढळून आले. त्यानंतर आयुक्तांनी तांदळे यांच्याकडे विचारणादेखील केली. मात्र, त्यांच्याकडून समाधानकारक माहिती देण्यात आली नाही. यापूर्वी २०२३ मध्येही महापालिकेचे तत्कालीन आयुक्त विक्रम कुमार यांनीदेखील मलनिस्सारण विभागाच्या तक्रारी, जलपर्णीच्या कामाची माहिती न देणे, नोटिशीला उत्तर न देणे, या कारणांमुळे तांदळे यांच्यावर कारवाई केली होती.