पुणे : पावसाने उघडीप दिल्यानंतर मार्केट यार्डातील घाऊक बाजारात फळभाज्यांची आवक वाढली. शेवगा, मटार, फ्लाॅवर, घेवडा या फळभाज्यांच्या दरात पाच ते दहा टक्क्यांनी घट झाली. अन्य फळभाज्यांचे दर स्थिर असल्याची माहिती घाऊक बाजारातील व्यापाऱ्यांनी दिली.
श्री छत्रपती शिवाजी मार्केट यार्डातील घाऊक बाजारात रविवारी राज्य, तसेच परराज्यातून मिळून ९० ट्रक फळभाज्यांची आवक झाली. कर्नाटक, गुजरातमधून मिळून ४ ते ५ टेम्पो कोबी, आंध्र प्रदेश, तामिळनाडूतून मिळून ३ ते ४ टेम्पो शेवगा, कर्नाटक, गुजरात, उत्तर प्रदेशातून ७ ते ८ टेम्पो हिरवी मिरची, हिमाचल प्रदेशातून २ टेम्पो मटार, कर्नाटकातून ३ ते ४ टेम्पो घेवडा, आंध्र प्रदेश, कर्नाटकातून २ टेम्पो तोतापुरी कैरी, गुजरात आणि मध्य प्रदेशातून १० ते १२ टेम्पो लसूण अशी आवक झाली, अशी माहिती मार्केट यार्डातील ज्येष्ठ अडते विलास भुजबळ यांनी दिली.
पुणे विभागातून सातारी आले ५५० ते ६०० गोणी, भेंडी ६ ते ७ टेम्पो, गवार ४ ते ५ टेम्पो, टोमॅटो ८ ते १० हजार पेटी, हिरवी मिरची ४ ते ५ टेम्पो, ढोबळी मिरची ८ ते १० टेम्पो, काकडी ७ टेम्पो, कोबी ४ ते ५ टेम्पो, फ्लाॅवर १४ ते १५ टेम्पो, भुईमूग शेंग १०० ते १२५ गोणी, तांबडा भोपळा १० ते १२ टेम्पो, मटार ७०० ते ८०० गोणी, कांदा ५५ ते ६० ट्रक, तसेच इंदूर, आग्रा, स्थानिक भागातून ३० ते ३५ ट्रक बटाट्याची आवक झाली.
मेथी, कांदापातीच्या दरात घट
गेल्या आठवड्याच्या तुलनेत पालेभाज्यांची आवक वाढली. मेथी, शेपू, करडई, कांदापातीच्या दरात घट झाली. मुळे, पालकाच्या दरात पाच ते दहा टक्क्यांनी वाढ झाली, अशी माहिती तरकारी विभागातील व्यापाऱ्यांनी दिली. मार्केट यार्डातील तरकारी विभागात रविवारी कोथिंबिरीच्या दीड लाख जुडींची, तसेच मेथीच्या ८० हजार जुडींची आवक झाली.
पालेभाज्यांचे शेकड्यातील दर पुढीलप्रमाणे – कोथिंबीर – ५०० ते १०००, मेथी – ५०० ते १०००, शेपू – ४०० ते ७००, कांदापात – ८०० ते १५००, चाकवत – ४०० ते ६००, करडई – ३०० ते ६००, पुदिना – ५०० ते ६००, अंबाडी – ३०० ते ६००, मुळे – ८०० ते १५००, राजगिरा – ३०० ते ७००, चुका – ३०० ते ७००, चवळई – ३०० ते ६००, पालक – १२०० ते १५००
आषाढातील शेवटच्या रविवारी मटण, मासळीला मागणी
आषाढ महिन्यात सामिष खवय्यांकडून मटण, मासळी, चिकन, अंड्यांना मागणी वाढते. आषाढ महिन्यातील शेवटचा रविवार असल्याने मटण, मासळी, चिकन, अंड्यांच्या मागणीत वाढ झाली. मासळीचे दर तेजीत आहेत. गणेश पेठेतील मासळी बाजारात खोल समुद्रातील मासळी १० ते १५ टन, खाडीतील मासळी ३०० ते ४०० किलो, नदीतील मासळी २ ते ३ टन, तसेच आंध्र प्रदेशातून रहू, कतला, सीलन या मासळीची १५ ते २० टन आवक झाली, अशी माहिती मासळी बाजारातील व्यापाऱ्यांनी दिली. अंड्याच्या दरात शेकड्यामागे ५० ते ६० रुपयांनी घट झाली.
