नेमके काय घडले शिवाजीनगर मेट्रो स्थानकाच्या परिसरात…

याबाबत पोलीस शिपाई अक्षय डिंडोरे यांनी शिवाजीनगर पोलीस ठाण्यात फिर्याद दिली आहे. याप्रकरणी नाना बापू नाईकनवरे (वय २४), सनी मुकेश नाईकनवरे (वय २२, दोघे रा. एसआरए वसाहत, विमाननगर), दक्षेश विठ्ठल कुरपे (वय २४, रा. सरगम सोसायटी, वारजे जकात नाका), गणेश संजय तुपसौंदर (वय २२, रा. कुंभारवाडा चौक, कसबा पेठ), विकी कारंडे (वय २४, रा. बराटे चाळ, कर्वेनगर), सार्थक कदम यांच्याविरुद्ध गुन्हा दाखल करण्यात आला आहे. आरोपींना अटक करण्यात आली आहे.

पोलिसांनी दिलेल्या माहितीनुसार, आरोपी रविवारी शिवाजीनगर मेट्रो स्थानकाच्या परिसरात कामगार पुतळा परिसरात थांबले होते. त्यांनी दारू पिऊन रस्त्यात गोंधळ घालण्यास सुरुवात केली. सार्वजनिक ठिकाणी मद्यपी टोळके गोंधळ घातल्याची माहिती मिळाल्यानंतर पोलीस शिपाई डिंडोरे तेथे गेले. त्यांनी आरोपींना रस्त्यात गोंधळ घालू नका, असे सांगितले. तेव्हा आरोपींनी डिंडोरे यांना धक्काबुक्की करुन शिवीगाळ केली. शासकीय कामात अडथळा आणणे, धक्काबुक्की करणे, तसेच सार्वजनिक ठिकाणी मद्य पिऊन गोंधळ घातल्याप्रकरणी सहा जणांना अटक करण्यात आली आहे. पोलीस उपनिरीक्षक पाटील तपास करत आहेत.

शहर, तसेच उपनगरात सार्वजनिक ठिकाणी मद्य पिऊन गोंधळ घालण्याच्या घटना वाढल्या आहेत. अनेक जण रस्त्यावरील अंडा भुर्जीच्या गाड्यांवर मद्यप्राशन करतात. सार्वजनिक ठिकाणी मद्यप्राशन करण्यास मनाई आहे. शहरातील अंडा भुर्जी, चायनीज खाद्यपदार्थांच्या गाड्यांवर सर्रास मद्यप्राशन केले जात असल्याचे दिसून आले आहे. मद्यपी टोळक्यामुळे नागरिकांना त्रास होत असल्याच्या तक्रारी करण्यात आल्या आहेत. पोलीस कर्मचाऱ्यांना धक्काबुक्की करण्याचे प्रकार वाढले आहेत. वाहतूक नियमन करणाऱ्या पोलिसांशी अरेरावी करुन शासकीय कामात अडथळा आणण्याच्या घटना घडल्या आहेत.

वाहतूक नियम धुडकावून भरधाव वेगात निघालेल्या वाहनचालकाने वाहतूक पोलिसाला मारहाण केल्याची घटना पुणे-सोलापूर रस्त्यावरील हडपसर परिसरात घडली. शासकीय कामात अडथळा, तसेच वाहतूक पोलिसाला मारहाण केल्याप्रकरणी वाहनचालकाला अटक करण्यात आली. रमाकांत दत्तात्रय शिंदे (वय ४८, रा. पिसोळी) असे अटक करण्यात आलेल्या वाहनचालकाचे नाव आहे. याबाबत पोलीस कर्मचारी महादेव धामणगावकर यांनी हडपसर पोलीस ठाण्यात फिर्याद दिली आहे.