मेट्रो प्रवासी महिलेशी ज्येष्ठ नागरिकाचे अश्लील वर्तन

मेट्रो प्रवासी महिलेशी अश्लिल वर्तन करणाऱ्या एकाविरुद्ध विश्रामबाग पोलिसांनी गुन्हा दाखल केला. महात्मा फुले मंडई मेट्रो स्थानक परिसरात ही घटना घडली.

pune sexually abusing female metro passenger

मेट्रो प्रवासी महिलेशी अश्लील वर्तन करणाऱ्या ज्येष्ठ नागरिकाविरुद्ध गुन्हा दाखल करण्यात आला आहे. (file photo)

पुणे : मेट्रो प्रवासी महिलेशी अश्लील वर्तन करणाऱ्या एकाविरुद्ध विश्रामबाग पोलिसांनी गुन्हा दाखल केला. महात्मा फुले मंडई मेट्रो स्थानक परिसरात ही घटना घडली.या प्रकरणी एका ज्येष्ठ नागरिकाविरुद्ध गुन्हा दाखल करण्यात आला आहे. गुन्हा दाखल करण्यात आलेला आरोपी मूळचा बिहारमधील मुझफ्फरनगरचा रहिवासी आहे. याबाबत एका महिलेने विश्रामबाग पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, तक्रारदार महिला मंगळवारी (९ सप्टेंबर) दुपारी दोनच्या सुमारास मेट्रोतून प्रवास करत होती. त्या वेळी आरोपीने महिलेकडे एकटक पाहून इशारे केले. त्याने महिलेची मोबाइल कॅमेऱ्याद्वारे छायाचित्रे काढण्याचा प्रयत्न केला. ही बाब महिलेच्या लक्षात आल्यानंतर तिने मेट्रो स्थानकातील सुरक्षारक्षकांना दिली. प्रवाशाला ताब्यात घेऊन मंडई पोलीस चौकीत आणण्यात आले. या प्रकरणात गुन्हा दाखल करण्यात आलेल्या ६५ वर्षीय प्रवाशाविरुद्ध नोटीस बजाविण्यात आली आहे. अश्लिल वर्तन केल्या प्रकरणी गुन्हा दाखल करण्यात आला आहे. सहायक पोलीस निरीक्षक वाघमारे तपास करत आहेत.

गणेशोत्सवात मेट्रोने प्रवाशांच्या संख्येत वाढ झाली होती. मंडई, कसबा पेठ, जिल्हा न्यायालय, स्वारगेट मेट्रो स्थानकात गर्दी झाली होती. गर्दी नियंत्रित करण्यासाठी तेथे पोलीस बंदोबस्त, तसेच मेट्रो व्यवस्थापनाकडून उपाययोजना करण्यात आल्या होत्या.