पुण्यात ‘टीसीएस’ला नोटिसा नेमक्या कशामुळे? कारणे अखेर समोर; पुढे काय होणार…

तक्रार १

हा तक्रारदार हा कंपनीत टीम लीडर या पदावर कार्यरत होता. तो कंपनीत नऊ वर्षांपासून पासून काम करीत होता. तो कंपनीसाठी काही काळ आयर्लंडमध्येही कार्यरत होता. त्याची सेवा कंपनीने संपुष्टात आणली. कंपनीने पुन्हा सेवेत घ्यावे, अशी मागणी त्याने केली आहे. याचबरोबर सेवेतून काढून टाकल्याच्या काळातील वेतन मिळावे, असेही त्याने म्हटले आहे. कंपनीने त्याच्यावर शिस्तभंगाची कारवाई करून सेवेतून काढून टाकल्याची बाजू मांडली. यावर कंपनीला लेखी उत्तर देण्याचे निर्देश देण्यात आले आहेत, अशी माहिती कामगार अधिकाऱ्यांनी दिली.

तक्रार २

हा तक्रारदार टीसीएसमध्ये चार वर्षांपासून नोकरीत होता. वरिष्ठ व्यवसाय विकास अधिकारी या पदावर तो कार्यरत होता. त्याचे चार महिन्यांचे वेतन कंपनीने दिलेले नाही. याचबरोबर त्याला नुकसानभरपाई न देता सेवेतून मुक्त करण्यात आले. यामुळे तीव्र आर्थिक अडचणींना सामोरे जावे लागत असल्याचा दावा तक्रारदाराने केला आहे. बेंच कालावधीचे वेतनही परत करण्यासाठी कंपनी दबाव आणत असून, मी कामावर हजर असतानाही काम देण्यात आले नाही, असा आरोप त्याने केला आहे. या प्रकरणी कंपनीने तक्रारदार हा कामावर हजरच नव्हता, असा खुलासा केला. तक्रारदार आणि कंपनीत या प्रकरणी समेट झालेला नाही. त्यामुळे या तक्रारदाराला कामगार न्यायालयात दाद मागण्याचा मार्ग खुला आहे, असे कामगार अधिकाऱ्यांनी सांगितले.

तक्रार ३

हा तक्रारदार टीसीएसमध्ये १२ वर्षांहून अधिक काळ नोकरी करीत होता. तो व्यवसाय विकास अधिकारी या पदावर कार्यरत होता. त्याला कंपनीने तडकाफडकी नोकरीवरून काढून टाकले. कंपनीने पुन्हा सेवेत घ्यावे, अशी मागणी त्याने केली आहे. याचबरोबर नोकरीवरून कमी केलेल्या काळाचे वेतन मिळावे, असेही त्याने तक्रारीत म्हटले आहे. यावरील सुनावणीवेळी तक्रारदार हजर नव्हता. त्यामुळे पुढील सुनावणीची तारीख देण्यात आली आहे.

टीसीएस कंपनीच्या विरोधात कर्मचाऱ्यांनी केलेल्या तीन तक्रारींवर सुनावणी घेण्यात आली. यावेळी तक्रारदारांसह कंपनीच्या अधिकाऱ्यांची बाजू ऐकून घेण्यात आली. या प्रकरणी लेखी खुलासा सादर करण्याचे निर्देश कंपनीला देण्यात आले आहेत. – सं.भि.गुंजाळ, सरकारी कामगार अधिकारी