मार्केट यार्डातील घाऊक बाजारात आवक वाढल्याने बटाटा, मटार, पावटा या फळभाज्यांच्या दरात १० ते २० टक्क्यांनी घट झाली. अन्य फळभाज्यांचे दर स्थिर असल्याची माहिती व्यापाऱ्यांनी दिली. गुलटेकडी येथील श्री छत्रपती शिवाजी मार्केट यार्डात रविवारी (११ डिसेंबर) राज्य; तसेच परराज्यांतून ९० ट्रक फळभाज्यांची आवक झाली. गेल्या आठवड्याच्या तुलनेत घाऊक बाजारात फळभाज्यांची आवक कमी झाली आहे. आंध्र प्रदेश, कर्नाटक, गुजरातमधून मिळून १० ते १२ ट्रक हिरवी मिरची, कर्नाटकातून ४ ते ५ टेम्पो कोबी तसेच ३ ते ४ टेम्पो घेवडा, आंध्र प्रदेश आणि तामिळनाडूतून २ टेम्पो शेवगा, राजस्थानातून ९ ते १० टेम्पो गाजर, पंजाब आणि मध्य प्रदेशातून मिळून २५ टेम्पो मटार, गुजरातमधून २ टेम्पो भुईमूग शेंग, कर्नाटकातून २ टेम्पो तोतापुरी कैरी, बंगळुरुतून २ टेम्पो आले, मध्य प्रदेश आणि गुजरातमधून मिळून १० ते १२ ट्रक लसूण, आग्रा, इंदूर तसेच पुणे विभागातून मिळून ४० ते ४५ ट्रक बटाटा अशी आवक परराज्यांतून झाली, अशी माहिती घाऊक बाजारातील प्रमुख अडते विलास भुजबळ यांनी दिली.
पुणे विभागातून सातारी आले ९०० ते एक हजार गोणी, टोमॅटो १० ते ११ हजार पेटी, गवार ५ ते ६ टेम्पो, भेंडी ५ ते ६ टेम्पो, हिरवी मिरची ५ ते ६ टेम्पो, काकडी ७ ते ८ टेम्पो, फ्लाॅवर १० ते १२ टेम्पो, कोबी ५ ते ६ टेम्पो, ढोबळी मिरची १४ ते १५ टेम्पो, तांबडा भोपळा ८ ते १० टेम्पो, घेवडा ४ ते ५ टेम्पो, कांदा १२५ ट्रक अशी आवक झाली.
हेही वाचा: पुणे: कलाकार हे मूलत: व्यावसायिक खोटारडे; ज्येष्ठ अभिनेते कबीर बेदी यांचे मत
पालेभाज्यांच्या दरात घट
मार्केट यार्डातील तरकारी विभागात कोथिंबीर, शेपू, पुदीना, अंबाडी, मुळा, राजगिरा, चुका या पालेभाज्यांच्या दरात घट झाली. मेथी आणि करडईच्या दरात वाढ झाली असून कांदापात, पालक, चाकवत, चवळई या पालेभाज्यांचे दर स्थिर असल्याची माहिती तरकारी विभागातील व्यापाऱ्यांनी दिली. घाऊक बाजारात कोथिंबिरेच्या दीड लाख जुडी, मेथीच्या ५० हजार जुडींची आवक झाली. मुळ्याच्या जुडीमागे ३ रुपयांनी, कोथिंबिर, शेपू, पुदीना, चुक्याच्या जुडीमागे २ रुपयांनी घट झाली. मेथी आणि करडईच्या जुडीमागे १ ते २ रुपयांनी वाढ झाली.
अननस, बोेरे, लिंबांच्या दरात घट
पावसाळी वातावरणामुळे बोरांची आवक वाढली आहे तसेच लिंबांची आवक वाढली आहे. बोरांच्या दरात १० ते १५ टक्क्यांनी घट झाली आहे. लिंबांच्या गोणीमागे ५० रुपयांनी घट झाली आहे. अननसच्या दरात डझनामागे १०० रुपयांनी घट झाली आहे. थंडीमुळे मागणी वाढल्याने पपईच्या दरात किलोमागे ५ रुपयांनी वाढ झाली. डाळिंब, संत्री, मोसंबी, सीताफळ, कलिंगड, खरबूज, चिक्कू, पेरु आणि सफरचंदाचे दर स्थिर असल्याची माहिती फळबाजारातील व्यापाऱ्यांनी दिली. फळबाजारात केरळहून ४ ट्रक अननस, संत्री २५ ते ३० टेम्पो, मोसंबी ४० ते ५० टन, डाळिंब ३० ते ३५ टन, पपई ८ ते १० टेम्पो, लिंबे ४ ते ५ हजार गोणी, पेरु १२०० ते १३०० प्लास्टिक जाळी (क्रेट्स) कलिंगड ७ ते ८ ट्रक, खरबूज ३ ते ४ ट्रक, बोरे १ ते दीड हजार गोणी, सीताफळ १० ते १५ टन अशी आवक झाली.
हेही वाचा: पुणे: हाॅटेल मालकाकडून ग्राहकांवर चाकूने वार; कात्रज भागातील घटना
मटण, मासळीच्या मागणीत घट
मार्गशीर्ष महिन्यात श्री महालक्ष्मीचे व्रत केले जात असल्याने मटण, मासळी, चिकनच्या मागणीत घट झाली आहे. मार्गशीर्ष महिन्याची सांगता झाल्यानंतर मटण, मासळीच्या मागणीत वाढ होईल, असे व्यापाऱ्यांनी सांगितले.
