नेपाळ, काशी, अयोध्या यात्रेच्या बहाण्याने सेवानिवृत्त पोलीस उपनिरीक्षकाची फसवणूक

भिकन एकनाथ दुसाने (वय ६९, रा. मोशी) यांनी एमआयडीसी भोसरी पोलीस ठाण्यात फिर्याद दिली आहे. त्यानुसार महेश बारसू फालक याच्या विरोधात गुन्हा दाखल करण्यात आला आहे. दुसाने हे मुंबई पोलीस दलातून उपनिरीक्षक म्हणून सेवानिवृत्त झाले आहेत. फालक याने दुसाने यांना नेपाळ, काशी, अयोध्या येथे यात्रेसाठी नेण्याचे आमिष दाखविले. त्यासाठी दुसाने आणि त्यांच्या नातेवाईकांकडून २,०२, ५०० रुपये घेतले. प्रवास सुरू होण्यापूर्वी २० दिवस अगोदर कळविल्यास तिकीट रद्द करून सर्व पैसे परत देतो असे दुसाने यांना सांगण्यात आले. दरम्यान फालक याने दुसाने यांचे रेल्वेचे तिकीट बुक केले नाही. तसेच त्यांनी भरलेले पैसे परत न देता त्यांची फसवणूक केली. एमआयडीसी भोसरी पोलीस तपास करीत आहेत.