पुणे : गणेशोत्सव खरेदीसाठी मध्यभागात शनिवारी खरेदीसाठी मोठ्या प्रमाणावर गर्दी झाली. खरेदीसाठी शहर, तसेच उपनगरातील नागरिकांनी गर्दी केली होती. मोठ्या संख्येने मध्यभागातील रस्त्यावर वाहने आल्याने वाहतूक विस्कळीत झाली होती.
गणेशोत्सवाचा प्रारंभ येत्या बुधवारी (२७ ऑगस्ट) होणार आहे. गणेशोत्सवाचा प्रारंभ होण्यास अवघे तीन दिवस राहिल्याने शनिवारी मध्यभागात गर्दी झाली होती. उपनगरातील बाजारपेठेत खरेदीसाठी गर्दी झाली होती. मंडई, शनिपार, रविवार पेठेतील कापडगंज, बोहरी आळी, तुळशीबाग परिसरात शनिवारी सकाळपासून गर्दी झाली होती. शनिवारी आणि रविवारी सुट्या असल्याने नागरिकांनी सहकुटुंब खरेदीसाठी गर्दी केली होती. मंडई, तुळशीबाग, शनिपार, रविवार पेठेतील बोहरी आळी परिसरातील वाहतूक विस्कळीत झाली होती. नागरिकांनी कोंडीतून वाट काढत खरेदीचा आनंद लुटला. बाजीराव रस्ता, शिवाजी रस्ता परिसरातील वाहतुकीचा वेग संथ झाल्याने वाहनांच्या रांगा लागल्या होत्या. सजावट साहित्य, विद्युत माळा, पूजा साहित्याची नागरिरकांनी खरेदी केली.
मध्यभागातील मंडई, नारायण पेठ परिसरात वाहनतळावर मोटारी लावण्यास जागा उपलब्ध नसल्याने या भागात मोटारींच्या रांगा लागल्या होत्या. मध्यभागाासह. कोथरुड, कर्वेनगर, वारजे, हडपसर, कात्रज, धनकवडी, बिबवेवाडी, कोंढवा, वानवडी, विश्रांतवाडी या भागातील बाजारपेठेत गर्दी झाली होती. मंडई, रविवार पेठेत खरेदीसाठी मोठी गर्दी झाल्याने नियोजन करण्यासाठी या भागात वाहतूक पोलिसांकडून अतिरिक्त बंदोबस्त ठेवण्यात आला आहे, अशी माहिती वाहतूक पोलिसांनी दिली.
बेशिस्तीमुळे गल्ली बाेळात कोंडी
मध्यभागातील गल्ली बोळात बेशिस्तपणे वाहने लावल्याने वाहतूक विस्कळीत झाली होती. अनेक जण मध्यभागात खरेदीसाठी येतात. अरुंद गल्लीत दुचाकी, मोटारी लावल्याने कोंडीत भर पडली. रविवारी खरेदीसाठी मध्यभागासह उपनगरातील बाजारपेठेत गर्दी होईल.
रविवार पेठेतील रस्ते वाहतुकीस बंद
रविवार पेठेतील कापडगंज, बोहरी आळी परिसरात सजावट साहित्य खरेदीसाठी गर्दी होते. गर्दीचे नियोजन करण्यासाठी या भागातील अरुंद रस्ते वाहतुकीस बंद ठेवण्यात आले आहेत. या भागात खरेदीसाठी येणाऱ्या महिलांच्या पिशवीतून ऐवज, तसेच मोबाइल संच चोरीला गेल्याच्या घटना घडल्याने पोलिसांनी तेथे ‘चोरट्यांपासून सावध रहा’, अशा सूचना देणारे फलक लावले आहेत.
