फडणवीसांची सत्ताप्राप्तीची अस्वस्थता पुढे आणण्यासाठीच गुगली; पहाटेच्या शपथविधीवरून शरद पवार यांचा गौप्यस्फोट

पहाटेच्या शपथविधीच्या आधी शरद पवार यांच्याबरोबर बैठक झाली होती. त्यानंतर दोन दिवसांनी पवार यांनी भूमिका बदलली, असा आरोप उपमुख्यमंत्री फडणवीस यांनी केला होता. या संदर्भात पुण्यात झालेल्या पत्रकार परिषदेत शरद पवार यांनी काही गौप्यस्फोट केला.ते म्हणाले, हा राजकीय डाव होता का नाही, याचा अर्थ तुम्ही काढा. माझे सासरे सदू शिंदे देशातील उत्कृष्ट गुगली गोलंदाज होते. अनेक मातब्बर फलंदाजांच्या विकेट त्यांनी घेतल्या. मी क्रिकेट संघटनेचा अध्यक्ष होतो. मी क्रिकेट खेळलो नसलो, तरी गुगली कशी टाकायची आणि केव्हा टाकायची हे निश्चित माहिती आहे. समोरचा विकेट देत असेल, तर ती घेतलीच पाहिजे. फडणवीस त्यांची विकेट गेली हे सांगत नाहीत.दुहेरी खेळी करत पवार यांनी फसविले, असे फडणवीस म्हणतात; मात्र फडणवीस का फसले? भूमिका बदलली तर फडणवीस यांनी दोन दिवसांनी शपथ का घेतली? माझा पाठिंबा होता तर सरकार दोन दिवसच का टिकले, असेही ते म्हणाले.

२०१४ च्या विधानसभा निवडणुकीनंतर भाजपला उघडपणे बाहेरून पाठिंबा जाहीर केला होता. मात्र पाठिंबा देण्याची वेळ आली नाही. सन २०१९ मधील निवडणुकीनंतर आमच्यात तसे काही ठरले असते, तर मी जाहीरपणे सांगितले असते. त्या वेळी फडणवीस मला भेटले होते, हे खरे आहे. सत्तास्थापना आणि अन्य काही गोष्टींवर चर्चाही झाली. सत्तेसाठी फडणवीस यांना आमची मदत हवी होती. सत्तेसाठीची त्यांची अस्वस्थता पुढे आणण्यासाठीच काही गोष्टी करण्यात आल्या, असे पवार यांनी स्पष्ट केले.राष्ट्रवादी काँग्रेसच्या पाठिंब्याची खात्री होती तर मग त्यांनी चोरून शपथ का घेतली? फडणवीस यांना राष्ट्रवादीचा पाठिंबा असता तर सरकार दोन दिवसांत कोसळले असते का, अशी विचारणाही पवार यांनी केली.

राष्ट्रवादी काँग्रेसचा पाठिंबा नसल्याने फडणवीस यांना राजीनामा द्यावा लागला. सत्तेसाठी कोठेही जाऊ शकतो, काहीही करू शकतो, ही फडणवीस यांची पावले सर्वासमोर यावीत, यासाठी काही गोष्टी करण्यात आल्या होत्या. मी फसविले असे फडणवीस म्हणतात पण ते स्वत: का फसले हे सांगत नाहीत. या सगळय़ामध्ये पंतप्रधान नरेंद्र मोदी यांचा काहीही संबंध नव्हता. गुगली टाकताना अजित पवार यांचा चेंडू केला नाही. मात्र, फडणवीस सत्ता प्राप्तीसाठी काय करू शकतात, हे सर्वासमोर आले, असे पवार यांनी सांगितले.

अजित पवार यांना शपथेसाठी का पाठविले?

आपला निर्णय फिरवायचा होता, तर शरद पवार यांनी अजित पवार यांना शपथ घेण्यासाठी का पाठविले? सुप्रिया सुळे यांना का पाठविले नाही ? अजित पवार यांची त्यातून राजकीय बदनामी झाली किंवा त्यांना त्रास झाला. फडणवीस यांनी षटकार मारला आहे, असे भाजप प्रदेशाध्यक्ष चंद्रशेखर बावनकुळे यांनी म्हटले आहे.