पुण्यात काय चाललेय काय? दुचाकीवरून येतात अन्…

तरुणाकडील मोबाइल हिसकावला

नारायण पेठेत पादचारी तरुणाकडील मोबाइल संच हिसकावून नेल्याची घटना घडली. याबाबत एका तरुणाने विश्रामबाग पोलीस ठाण्यात फिर्याद दिली आहे. तक्रारदार तरुण नारायण पेठेत राहायला आहे. हा तरुण सोमवारी (२७ ऑक्टोबर) रात्री सव्वानऊच्या सुमारास नारायण पेठेतील क्रीडामहर्षी हरिभाऊ साने वाहनतळ परिसरातून निघाला होता. त्या वेळी दुचाकीस्वार चोरट्यांनी तरुणाच्या हातातील ४० हजार रुपयांचा मोबाइल संच हिसकावून नेला. या घटनेची माहिती मिळताच पोलिसांनी घटनास्थळी धाव घेतली. पसार झालेल्या चोरट्यांचा माग काढण्यात येत असून, पोलिसांनी नारायण पेठ परिसरातील सीसीटीव्ही चित्रीकरण तपासले आहे. पोलीस हवालदार साबळे तपास करत आहेत.

रेल्वे स्थानकाच्या आवारातून बुलेट चोरी

पुणे रेल्वे स्थानकाच्या आवारातील वाहनतळावर लावलेली बुलेट चोरट्यांनी चाेरून नेल्याची घटना उघडकीस आली. याबाबत एका तरुणाने बंडगार्डन पोलीस ठाण्यात फिर्याद दिली आहे. तक्रारदार तरुण हडपसरमधील फुरसुंगी भागात राहायला आहे. पुणे रेल्वे स्थानकाच्या आवारातील वाहनतळावर त्याने बुलेट लावली होती. चोरट्यांनी बुलेटच्या हँडलचे लाॅक तोडून बुलेट चोरून नेल्याची घटना २६ ऑक्टोबर रोजी घडली. चोरीला गेलेल्या बुलेटची किंमत दोन लाख ३० हजार रुपये आहे. पोलीस उपनिरीक्षक गणेश चव्हाण तपास करत आहेत.

लोणी काळभोरमध्ये घरफोडी

लोणी काळभोर भागातील एका घराचे कुलूप तोडून चोरट्यांनी तीन लाख सहा हजार रुपयांचे सोन्याचे दागिने लांबविले. याबाबत एकाने लोणी काळभोर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार लोणी काळभोरमधील बाजारमळा परिसरात राहायला आहेत. दिवाळीनिमित्त तक्रारदार आणि कुटुंबीय बाहेरगावी गेले होते. चोरट्यांनी घराचे कुलूप तोडून कपाटातील तीन लाख सहा हजार रुपयांचे सोन्याचे दागिने लांबविले. सहायक पोलीस निरीक्षक बोराटे तपास करत आहेत.