पिंपरी: उद्योगनगरीत चार दिवसांत तीन खून

मंगळवारी मध्यरात्री सव्वाबाराच्या सुमारास लक्ष्मीपुरा येथे चार कामगार जुगार खेळत होते. जुगार खेळण्यावरून त्यांच्यात वाद झाला. त्यांनी एकमेकांना मारहाण केली. शिवप्रसाद याने सखाराम, त्याचा लहान भाऊ जोधिया आणि संजय या तिघांवर चाकूने हल्ला केला. यामध्ये सखाराम याच्या छातीवर डाव्या बाजूला चाकूचा गंभीर वार झाल्याने त्यात त्याचा मृत्यू झाला. तर, जोधिया आणि संजय हे गंभीर जखमी झाले.

मोशीमध्ये कठीण वस्तुने प्रहार करून अंदाजे ५० वर्षीय व्यक्तीचा खून केला. ही घटना सोमवारी  सकाळी साडेअकराच्या सुमारास उघडकीस आली. खून झालेल्या व्यक्तीची ओळख पटलेली नाही. मोशी मधील मातेरे हाउसच्या समोर एक जण बेशुद्ध अवस्थेत पडला असल्याची माहिती एमआयडीसी पोलिसांना मिळाली. त्यानुसार, पोलिसांनी घटनास्थळी धाव घेतली. मैदानात एक व्यक्ती मृतावस्थेत पडल्याचे दिसले. बाह्यांगावर कोणत्याही जखमा आढळलेल्या नाहीत. दगडाने अथवा कठीण वस्तूने प्रहार केल्यान अंतर्गत रक्तस्त्राव झाला असल्याची प्राथमिक शक्यता पोलिसांनी वर्तवली.

पिंपरीतील वायसीएम रुग्णालयाच्या नवीन इमारतीसमोर टोळक्याने तरुणाला बेदम मारहाण करत हत्याराने वार करून खून केला. ही घटना शनिवारी  सकाळी सात वाजता उघडकीस आली. आदर्श बलवंत सिंग (वय १९, रा. नेहरूनगर, पिंपरी) असे खून झालेल्या तरुणाचे नाव आहे. त्याचे वडील बलवंत हिम सिंह (वय ५१, रा. नेहरूनगर, पिंपरी) यांनी पिंपरी पोलीस ठाण्यात फिर्याद दिली आहे.

अतुल डोंगरे (वय २३, रा. वल्लभनगर, पिंपरी), सुशांत जाधव (वय २६, रा. विठ्ठलनगर, पिंपरी), सुशांत लष्करे (वय २४, रा. खराळवाडी, पिंपरी), अजिंक्य टाकळकर (वय २२, रा. मोशी) आणि त्यांच्या साथीदारांवर गुन्हा दाखल करण्यात आला आहे. आरोपींनी आदर्श याला कमरेच्या पट्ट्याने मारहाण केली.

त्याच्या डोक्यात पाठीमागील बाजूला अवजड वस्तूने आघात केले. पाठीवर, छातीवर, चेहर्‍यावर, पायावर धारदार हत्याराने वार करून त्याचा खून केला.