लोकसत्ता वार्ताहर
लोणावळा: शनिवार व रविवारच्या सुट्टयांना जोडून गुड फ्रायडेची सुट्टी आल्याने शुक्रवारी सकाळपासून मुंबई पुणे द्रुतगती मार्गावर मोठी वाहतूक कोंडी झाली होती. मुंबई भागातून मोठ्या संख्येने पर्यटक खाजगी वाहनांमधून बाहेर पडल्याने खालापूर टोलनाका आणि खंडाळा घाट भागात वाहतूक कोंडी झाली होती.
ही कोंडी सोडविण्यासाठी साडेअकरा वाजल्यापासून महामार्ग पोलिसांनी आडोशी बोगदा ते खंडाळा बोगदा परिसरात पुणे मुंबई मार्गिकेवर वाहतूक ब्लॉक घेत मुंबईकडून पुण्याच्या दिशेने येणारी वाहने सोडण्यात आल्याने दोन्ही मार्गिकांवर वाहतूक कोंडी झाली होती. दुपारपर्यंत ही कोंडी कायम होती. खंडाळा आणि बोरघाट महामार्ग पोलीस ही कोंडी सोडविण्यासाठी दिवसभर प्रयत्न करत होते. मात्र, वाहनांची संख्या जास्त असल्याने घाट परिसरात वाहतुकीचा वेग मंदावला होता.
