पुणे : आवक वाढल्याने भेंडी, दोडका, कारली, काकडी या फळभाज्यांच्या दरात १० ते २० टक्क्यांनी घट झाली. अन्य फळभाज्यांचे दर स्थिर राहिले. श्री छत्रपती शिवाजी मार्केट यार्डातील घाऊक बाजाराला स्वातंत्र्यदिनानिमित्त सुटी होती. शनिवारी बाजाराचे कामकाज बंद होते. रविवारी राज्य, तसेच परराज्यातून फळभाज्यांची आवक वाढली. बाजारात मिळून १०० ट्रक फळभाज्यांची आवक झाली. कर्नाटक, गुजरातमधून मिळून ४ ते ५ टेम्पो कोबी, आंध्र प्रदेश, तामिळनाडूतून मिळून ३ ते ४ टेम्पो शेवगा, कर्नाटक, गुजरात, उत्तर प्रदेशातून १० ते १२ टेम्पो हिरवी मिरची, कर्नाटकातून २ ते ३ टेम्पो पावटा, तसेच ४ ते ५ टेम्पो घेवडा, तामिळनाडूतून ५० ते ६० प्लास्टिक जाळी (क्रेट्स) तोतापुरी कैरी, गुजरात आणि मध्य प्रदेशातून १० ते १२ टेम्पो लसूण अशी आवक झाली, अशी माहिती मार्केट यार्डातील ज्येष्ठ अडते विलास भुजबळ यांनी दिली.
पुणे विभागातून सातारी आले ४०० ते ५०० गोणी, भेंडी ७ ते ८ टेम्पो, गवार ४ ते ५ टेम्पो, टोमॅटो ९ ते १० हजार पेटी, हिरवी मिरची ४ ते ५ टेम्पो, ढोबळी मिरची ९ ते १० टेम्पो, काकडी ७ ते ८ टेम्पो, कोबी ५ ते ६ टेम्पो, फ्लाॅवर ८ ते १० टेम्पो, भुईमूग शेंग १५० गोणी, तांबडा भोपळा १० ते १२ टेम्पो, मटार ७०० ते ८०० गोणी, कांदा १३० ते १४० ट्रक, तसेच इंदूर, आग्रा, स्थानिक भागातून ४० ते ४५ ट्रक बटाट्याची आवक झाली.
चाकवत, करडई, पुदिन्याच्या दरात घट
श्रावण महिन्यात पालेभाज्यांना मागणी वाढली असून, चाकवत, करडई, पुदिन्याच्या दरात घट झाली आहे. अन्य पालेभाज्यांचे दर स्थिर असल्याची माहिती सरकारी विभागातील व्यापाऱ्यांनी दिली. मार्केट यार्डातील सरकारी विभागात रविवारी कोथिंबिरीच्या पावणेदोन लाख जुडींची, तसेच मेथीच्या ७० हजार जुडींची आवक झाली. पालेेभाज्यांचे शेकड्यातील दर पुढीलप्रमाणे – कोथिंबीर – ८०० ते १५००, मेथी – ८०० ते १२००, शेपू – ४०० ते ७००, कांदापात – ५०० ते १२००, चाकवत – ४०० ते ७००, करडई – ३०० ते ६००, पुदिना – ३०० ते ५००, अंबाडी – ४०० ते ६००, मुळे – ८०० ते १५००, राजगिरा – ३०० ते ६००, चुका – ४०० ते ७००, चवळई – ३०० ते ६००, पालक – ८०० ते १५००.
लिंबांच्या दरात वाढ
लिंंबांची अपेक्षित तोड न झाल्याने बाजारात आवक कमी झाली. लिंबांच्या १५ ते २० किलो गोणीमागे १०० रुपयांनी वाढ झाली आहे. कलिंगड, खरबूज, पपई, सीताफळाच्या दरात ५ ते १० टक्क्यांनी वाढ झाली आहे. उर्वरित फळांचे दर स्थिर आहेत, अशी माहिती फळबाजारातील व्यापाऱ्यांनी दिली. फळबाजारात रविवारी मोसंबी ५० ते ६० टन, संत्री २ ते ३ टन, डाळिंब ४० ते ४५ टन, पपई ७ ते ८ टेम्पो, लिंबे ८०० ते १००० गाेणी, कलिंगड ३ ते ४ टेम्पो, चिकू एक हजार डाग, पेरू ६०० ते ७०० प्लास्टिक जाळी (क्रेट्स), अननस ५ ट्रक, सीताफळ २० टन अशी आवक झाली.
