पुणे : पितृ पंधरवड्यात भाज्यांच्या मागणीत वाढ होते. मागणी वाढल्याने दर चढे असतात. मात्र, यंदा ऐन पितृ पंधरवड्यात भाज्या स्वस्त झाल्या आहेत. पावसाने उघडीप दिल्याने सर्व प्रकारच्या भाज्यांची बाजारात मुबलक आवक होत आहे.
पितृ पंधरवड्यात भाज्यांचे दर तेजीत असतात. यंदा पुणे विभागातील पुणे, सांगली, सातारा, कोल्हापूर, सोलापूर जिल्ह्यात चांगला पाऊस झाल्याने भाज्यांची लागवड मोठ्या प्रमाणावर झाली. आठवडाभरापासून पावसाने उघडीप दिली असून, सर्व प्रकारच्या भाज्यांची आवक मोठ्या प्रमाणावर होत आहे. पुण्यातील श्री छत्रपती शिवाजी मार्केट यार्ड, तसेच नवी मुंबईतील बाजार समितीच्या आवारात पुणे, नाशिक विभागातून मोठ्या प्रमाणावर भाज्यांची आवक होत आहे. पितृ पंधरवड्यात भाज्यांची आवक वाढल्याने दरात घट झाली आहे, अशी माहिती श्री छत्रपती शिवाजी मार्केट यार्डातील ज्येष्ठ अडते विलास भुजबळ यांनी दिली.
पितृ पंधरवड्यात भेंडी, गवार, लाल भोपळा, कारली, देठ, आळूची पाने, मेथी या भाज्यांना मागणी असते. यंदा पितरांना नैवेद्य अर्पण करण्यासाठी लागणाऱ्या सर्व भाज्यांची आवक बाजारात मोठ्या प्रमाणावर झाली आहे. पावसाने उघडीप दिल्याने भाज्यांची प्रतवारी चांगली आहे. पितृ पंधरवड्यात भाज्यांच्या दरात २० ते ३० टक्क्यांनी घट झाली, असे किरकोळ बाजारातील भाजीपाला व्यापारी प्रकाश ढमढेरे यांनी सांगितले.
पितृ पंधरवड्यात लागणाऱ्या भाज्यांचे किलोचे दर
भेंडी – ८० ते १०० रुपये
गवार – १०० ते १४० रुपये
गावरान गवार – १८० ते २०० रुपये
कारली – ८० ते १०० रुपये
देठ (जुडी) – २० ते ३० रुपये
आळूची पाने (जुडी) – १० ते १५ रुपये
मेथी (जुडी) -२० ते २५ रुपये
पितृ पंधरवड्यात भाज्यांना मागणी चांगली असते. यंदा भाज्यांची आवक चांगली होत आहे. पावसाने उघडीप दिल्याने भाज्यांची प्रतवारी चांगली आहे. दरात घट झाली आहे. नवरात्रोत्सवात उपवासासाठी भेंडी, राजगिरा या भाज्यांना मागणी असते.– प्रकाश ढमढेरे, भाजीपाला व्यापारी, किरकोळ बाजार
