चिखली-चऱ्होली नगररचना योजनेच्या विरोधात आंदोलन

दरम्यान, या योजनेच्याविरोधात ग्रामस्थ आक्रमक झाले असून, योजनेला विरोध दर्शवण्यासाठी सोमवारी कुदळवाडी येथील विठ्ठल रुक्मिणी मंदिरात बैठक झाली. त्यामध्ये जनआंदोलन उभारण्याचा निर्णय घेण्यात आला. लघुउद्योग संघटनेचे माजी अध्यक्ष तात्या सपकाळ, माजी स्वीकृत नगरसेवक दिनेश यादव, बाळासाहेब यादव, उदय पाटील, दिलीप यादव, रमेश मोरे, दत्तू मोरे, शैलेश मोरे यांच्यासह ग्रामस्थ मोठ्या संख्येने उपस्थित होते. यावेळी महापालिका प्रशासनाचा निषेध म्हणून योजनेच्या जाहीर प्रकटनाची होळी करण्यात आली.

चिखली, कुदळवाडीच्या जमिनी तत्कालीन पिंपरी-चिंचवड नवनगर विकास प्राधिकरणात गेल्या. महापालिकेच्या आरक्षणातही मोठे क्षेत्रफळ गेले आहे. घरकुलासाठी शंभर एकर क्षेत्र घेतले. यापूर्वीच या भागातील रस्त्यांसाठी देखील जमीन संपादित करण्यात आली. आता नगररचना योजनेसाठी पुन्हा एकदा स्थानिकांच्या जमिनी ताब्यात घेण्याच्या प्रशासनाच्या हालचाली असल्याचे दिनेश यादव म्हणाले.

महापालिका प्रशासनाच्या माध्यमातून चिखली आणि चऱ्होलीसाठी नगररचना योजना जाहीर करण्यात आली आहे. स्थानिक लोकप्रतिनिधी म्हणून या योजनेला विरोध आहे. भूमिपुत्र आणि स्थानिक लोकप्रतिनिधी यांना विश्वासात न घेता प्रशासन अशी योजना राबवू शकत नाही.या योजनेला तत्काळ स्थगिती देण्यात यावी.- महेश लांडगे, आमदार, भोसरी