पुणे : तुळशीबागेत चोरट्यांचा सुळसुळाट झाला आहे. खरेदीसाठी आलेल्या एका महिलेच्या पिशवीतून चोरट्यांनी २९ हजार रुपयांची रोकड लांबविल्याची घटना गुरुवारी घडली. याबाबत एका महिलेने विश्रामबाग पोलीस ठाण्यात फिर्याद दिली आहे. तिने दिलेल्या फिर्यादीनुसार, चोरट्यांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार महिला मूळची अहिल्यानगरमधील केडगावमधील रहिवासी आहे. भाऊबीजेच्या दिवशी (२३ ऑक्टाेबर) महिला खरेदीसाठी तुळशीबागेत आली होती. तुळशीबागेत दुपारी साडेबाराच्या सुमारास गर्दी होती. खरेदी करताना महिलेच्या पिशवीतून चोरट्यांनी २९ हजार ३०० रुपयांची रोकड लांबविली. रोकड चोरीला गेल्याचे लक्षात आल्यानंतर महिलेने विश्रामबाग पोलीस ठाण्यात धाव घेऊन तक्रार दिली. पोलीस कर्मचारी ननावरे तपास करत आहेत.
गेल्या काही महिन्यांपासून तुळशीबागेत खरेदीसाठी येणाऱ्या महिलांच्या पिशवीतून दागिने, रोकड चोरीला जाण्याच्या घटनांमध्ये वाढ झाली आहे. तुळशीबाग, रविवार पेठेतील बोहरी आळी परिसरात खरेदीसाठी आलेल्या महिलांच्या पिशवीतून रोकड, दागिने चोरीला जाण्याच्या घटना घडल्या आहेत.
आठवड्यापूर्वी तुळशीबागेत एका महिलेच्या पिशवीतून ऐवज चोरणाऱ्या एका महिलेसह तिच्या मुलीला पोलिसांनी अटक केली होती. त्यानंतरही तुळशीबागेत महिलांकडील ऐवज चोरीला जाण्याचे प्रकार सुरूच आहेत. तुळशीबागेतील चोरीच्या घटना रोखण्यासाठी दोन वर्षांपूर्वी सीसीटीव्ही कॅमेरे बसविण्यात आले होते.
