पुणे : प्रेमाचा बहाणा करून पैशांसाठी त्रास दिल्याने एका तरुणाने गळफास घेऊन आत्महत्या केल्याची घटना धायरी भागात घडली. तरुणाला आत्महत्येस प्रवृत्त केल्याच्या आरोपावरून एका महिलेला अटक करण्यात आली. या प्रकरणी महिलेच्या मुलीविरुद्धही गुन्हा दाखल करण्यात आला आहे. अटक करण्यात आलेल्या महिलेची मुलीविरुद्ध गुन्हा दाखल करण्यात आला आहे. याबाबत मृत तरुणाच्या पत्नीने नांदेड सिटी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आत्महत्या केलेला तरुण विवाहित होता. आरोपी महिला धायरी परिसरात राहायला आहे. आरोपीने तरुणाला प्रेमाच्या जाळ्यात ओढले. त्यानंतर त्याला धमकावून पैसे उकळण्यास सुरुवात केली. महिला, तिची मुलगी यांनी तरुणाला वारंवार त्रास दिला. त्यांच्या त्रासामुळे शनिवारी (१३ सप्टेंबर) तरुणाने राहत्या घरात आत्महत्या केल्याचे त्याच्या पत्नीने पोलिसांकडे दिलेल्या फिर्यादीत म्हटले आहे.
आत्महत्येस प्रवृत्त केल्याप्रकरणी आरोपी महिला व तिच्या मुलीविरुद्ध गुन्हा दाखल करण्यात आला आहे. महिलेला अटक करण्यात आली आहे. पोलीस उपनिरीक्षक दत्तात्रय सावंत तपास करत आहेत.
