पिंपरी : सांगवी येथे समाजमाध्यमावर पिस्तूल घेतलेली चित्रफीत प्रसारित झाल्याने एका तरुणाला अटक करण्यात आली आहे. ही घटना बुधवारी (२७ ऑगस्ट) रोजी जुनी सांगवीतीलऔंध जिल्हा आयुष रुग्णालयाजवळील पाण्याच्या टाकीजवळ घडली. ओम उर्फ नन्या विनायक गायकवाड (२१, जुनी सांगवी) याला अटक करण्यात आली आहे. त्याच्या साथीदाराविरोधात गुन्हा दाखल करण्यात आला आहे. याप्रकरणी पोलीस शिपाई आकाश खंडागळे यांनी सांगवी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपी ओम गायकवाडच्या हातात पिस्तूल असलेली चित्रफीत समाजमाध्यमावर मोठ्या प्रमाणात प्रसारित झाली होती. पोलिसांनी चौकशी केली असता, त्याने ती चित्रफीत स्वतःची असल्याचे कबूल केले. चित्रफीतीमधील पिस्तूल त्याच्या मित्राचे असल्याचे सांगितले. पोलीस पकडतील या भीतीने मित्राने ते पिस्तूल ओमकडे लपवण्यासाठी दिले होते. पोलिसांनी ओमने लपवून ठेवलेले ३० हजार रुपये किमतीचे देशी बनावटीचे पिस्तूल आणि एक जिवंत काडतूस जप्त केले. सांगवी पोलीस तपास करत आहेत.
लग्नाचे आमिष दाखवून महिलेची फसवणूक
एका तरुणाने महिलेशी मैत्री करून लग्नाचे आमिष दाखवून तिच्यासोबत शारीरिक संबंध ठेवले आणि नंतर जातीवरून अपमान करत लग्न करण्यास नकार दिला. ही घटना मार्च २०२५ ते ८ ऑगस्ट २०२५ या दरम्यान घडली. २८ ऑगस्ट रोजी या प्रकरणी गुन्हा दाखल करण्यात आला आहे.
याप्रकरणी २४ वर्षीय महिलेने हिंजवडी पोलीस ठाण्यात फिर्याद दाखल केली आहे. त्यानुसार सुनील शालिकराम पराळे (२६, मारुंजी, हिंजवडी) याला अटक करण्यात आली आहे.
पोलिसांनी दिलेल्या माहितीनुसार, पीडित महिला आणि आरोपी एकाच कंपनीत काम करतात. आरोपीने फिर्यादीचा विश्वास संपादन करून तिला लग्नाचे आमिष दाखवले. तिच्यासोबत शारीरिक संबंध ठेवले. त्यानंतर आरोपीने “तुझी जात वेगळी आहे” असे म्हणत तिच्याशी लग्न करण्यास नकार देऊन तिची फसवणूक केली. हिंजवडी पोलीस तपास करत आहेत.
चांदीच्या कड्याला सोन्याचा मुलामा देऊन फसवणूक
चिंचवड येथील सराफी पेढीत एका व्यक्तीने सोन्याचे कडे विकण्याच्या बहाण्याने चांदीच्या कड्याला सोन्याचा मुलामा देऊन दुकानाच्या मालकाची एक लाख ३० हजारांची फसवणूक केली. ही घटना १२ जुलै रोजी दुपारी घडली. या प्रकरणी २८ ऑगस्ट रोजी गुन्हा दाखल करण्यात आला आहे.
अमोल सुभाष बलदोटा (३३, धनकवडी, पुणे) याला अटक करण्यात आली आहे. या प्रकरणी अरविंद पनराज सोनिगरा (५१, चिंचवडगाव) यांनी चिंचवड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपीने फिर्यादीच्या दुकानात येऊन सोन्याचे कडे विकायचे असल्याचे सांगितले. त्याने चांदीच्या कड्याला सोन्याचा मुलामा देऊन ते सोन्याचे कडे आहे असे भासवून फिर्यादीकडून एक लाख ३० हजार रुपये घेतले आणि त्यांची फसवणूक केली. चिंचवड पोलीस तपास करत आहेत.
म्हाळुंगेत हॉटेल व्यावसायिकाला मारहाण
हॉटेल व्यावसायिकाला मारहाण करून त्याचे दुकान तोडल्याप्रकरणी पाच जणांवर गुन्हा दाखल करण्यात आला आहे. ही घटना बुधवारी (२७ ऑगस्ट) रात्री म्हाळुंगे एमआयडीसीत घडली. याप्रकरणी ३६ वर्षीय युवकाने दिलेल्या फिर्यादीवरुन एका महिलेसह पाच जणांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी त्यांच्या अंडा-भुर्जीच्या टपरीवर मित्रांसोबत जेवण करत असताना आरोपीने त्याच्यासोबत काम करणाऱ्या आचारीला नेपाळी भाषेत “काल नेपाळी सण होता, तरी तू कामावर का आला होतास? मला माझ्या मालकाने काल सुट्टी दिली होती” असे फिर्यादीला ऐकू जाईल अशा पद्धतीने विचारण्यास सांगितले. फिर्यादीने याबाबत विचारले असता आरोपीने शिवीगाळ करत त्यांच्यासोबत झटापट केली. त्यानंतर आरोपीने घरी जाऊन पत्नी आणि मुलांसोबत परत येऊन फिर्यादीला लोखंडी गज आणि लोखंडी पट्टीने मारहाण केली. आरोपीच्या पत्नीने हातात लोखंडी गज घेतला होता. आरोपीने लोखंडी पट्टी फेकून मारल्याने ती फिर्यादीच्या उजव्या डोळ्याच्या वर कपाळाला लागून त्यांना दुखापत झाली. त्यानंतर आरोपींनी फिर्यादीला पकडून लोखंडी गजाने त्यांच्या डोक्यावर आणि हातावर मारहाण केली. आरोपींनी फिर्यादीच्या दुकानातील खुर्च्या आणि टेबल तोडून नुकसान केले. म्हाळुंगे एमआयडीसी पोलीस तपास करत आहेत.
चिंचवडमध्ये पिस्तूल बाळगल्याप्रकरणी एकास अटक
बेकायदेशीरपणे शस्त्रे बाळगल्याप्रकरणी एका तरुणाला अटक करण्यात आली. त्याच्याकडून एक देशी बनावटीचे पिस्तूल, जिवंत काडतूस आणि दोन लोखंडी कोयते जप्त करण्यात आले आहेत. ही कारवाई चिंचवड येथील मदर तेरेसा उड्डाणपुलाजवळ केली.
उज्वल विनोद लवे (२३, पिंपरी) याला अटक करण्यात आली आहे. याप्रकरणी पोलीस हवालदार जयवंत राऊत यांनी फिर्याद दिली आहे.
पोलिसांनी दिलेल्या माहितीनुसार, आरोपीकडे ४० हजार रुपये किमतीचे देशी बनावटीचे पिस्तूल, ५०० रुपये किमतीचे जिवंत काडतूस आणि दोन लोखंडी कोयते असे एकूण ५१ हजार १०० किमतीची शस्त्रे सापडली. त्यामुळे त्याला अटक करण्यात आली आहे. चिंचवड पोलीस तपास करत आहेत.
