गुढी पाडव्यासाठी साखरेच्या गाठी यंदा बनवा घरीच, साखरेच्या बत्तास्यांची सोपी झटपट कृती

साखरेच्या गाठी साहित्य–

• साखर – १ कप
• दूध – १/२ टेबलस्पून
• तूप – १ टेबलस्पून
• खायचा रंग
• पाणी – १/२ कप
• गाठी तयार करण्याचा साचा
• धाग्याची गुंडी

साखरेच्या गाठी कृती –

१. साखरेच्या गाठी तयार करण्यासाठी सर्वप्रथम साच्याला आतून तूप लावून घ्यावे. (आपल्याकडे साचा नसल्यास छोट्या आकाराच्या वाट्या किंवा लहान आकाराच्या डिश किंवा चॉकलेट मोल्ड्सचा वापर केला तरीही चालेल.)

२. आता या साच्यांमध्ये एक लांबसर धागा असा ठेवा की त्याची एकसंध माळ तयार होईल. (हा धागा बरोबर प्रत्येक साच्यांच्या मधोमध आला पाहिजे.)

३. त्यानंतर एका भांड्यात साखर घेऊन त्यात अर्धा कप पाणी घालावे. हे मिश्रण गॅसच्या मंद आचेवर ठेवून हळुहळु चमच्याने ढवळत राहावे. या साखरेपासून मध्यम कन्सिस्टंन्सीचा पाक तयार करुन घ्यावा.

४. साखर संपूर्णपणे पाण्यांत मिसळल्यावर त्यांत अर्धा चमचा दूध घालावे. हे मिश्रण चमच्याने ढवळून घ्यावे.

५. साखरेचा पाक तयार झाला आहे की नाही हे पाहण्यासाठी पाकाचा एक थेंब वाटीत घेऊन, वाटी वाकडी करुन पाहावी. पाकाला ओघळ जात असेल तर पाक अजून तयार झाला नाही. पाकाला ओघळ जात नसेल तो एकाच ठिकाणी घट्ट चिकटून राहिला असेल तर समजावे पाक तयार झाला आहे.

६. जर आपल्याला रंगीत गाठ्या हव्या असतील तर आपल्या आवडीनुसार आपण यात फूड कलरचे २ थेंब घालू शकता.

७. तयार झालेला साखरेचा पाक आपल्याला साच्यांमध्ये चमच्याच्या मदतीने ओतायचा आहे. हा साखरेचा पाक साच्यांमध्ये ओतताना बरोबर धाग्यांच्यावर ओतायचा आहे. हा धागा संपूर्णपणे पाकात भिजेल याची खात्री करुन घ्यावी.

हेही वाचा >> गुढीपाडवा स्पेशल महाराष्ट्रीयन सात्विक थाळी; फक्त ३० मिनिटांत होईल संपूर्ण स्वयंपाक

८. आता २ ते ३ तास हा पाक सुकण्यासाठी ठेवावा. पाक संपूर्णपणे सुकल्यानंतर या गाठी अलगद हातांनी काढून घ्याव्यात.
अशाप्रकारे गुढीपाडव्यासाठी घरच्या घरी आपण झटपट साखरेच्या गाठ्या बनवू शकतो.