बुकबातमी : ‘करोनासुट्टी’तले दुसरे पुस्तक…

दिवस वावर-निर्बंधांचे, काही ठिकाणी टाळेबंदीचे आहेत. गेल्या वर्षीच्या मार्चपासूनच, म्हणजे करोनाचा कहर सुरू झाल्यापासून हे असेच सुरू आहे म्हणा. पण लहानग्यांसाठी तेव्हापासून जी शाळासुट्टी सुरू झाली, ती अजून संपलेली नाही. इथे कोणी म्हणेल, आहे की ऑनलाइन शाळा सुरू. तेही खरेच. पण प्रत्यक्ष शाळेत जायचे नाही अन् परीक्षाही नाही, म्हणजे लहानग्यांसाठी सुट्टीच. पण अशी दीर्घ सुट्टीही कंटाळवाणी वाटू शकते. नव्हे, त्या कंटाळवाणेपणाची तीव्रता आणि परिणाम सांगणारी सर्वेक्षणे, अभ्यासलेखही गेल्या सहाएक महिन्यांत खोऱ्याने प्रसिद्ध झाले आहेत. मग ही ‘सुट्टी’ कंटाळवाणी न वाटावी यासाठी काय करायचे, असाही प्रश्न अनेकांना पडला असेल. त्याचे पारंपरिक, पण सिद्ध उत्तर म्हणजे- वाचन! गेल्या मेमध्येच, म्हणजे करोनाची पहिली लाट ऐन भरात होती आणि भारतासह अनेक देश टाळेबंदीत होते, तेव्हाच ‘हॅरी पॉटर’ मालिकेच्या लेखिका जे. के. रोलिंग यांनी हे जाणले होते. लहानग्यांचे मनोविश्व त्यांना(च) नेमके कळले आहे, असे म्हणतात ते उगाच नाही! तर… या रोलिंगबाईंनी त्यांच्या नव्या पुस्तकाची घोषणा तेव्हा केली होती. ‘द ईकाबॉग’ हे त्याचे शीर्षक अन् ते त्यांच्या संकेतस्थळावर क्रमश: प्रसिद्ध होत होते. लहानग्यांनी या क्रमश: प्रसिद्ध होणाऱ्या भागांवर चित्रे काढायची आणि त्यांना पाठवायची, असे आवाहन रोलिंगबाईंनी तेव्हा केले होते. त्या चित्रांसह ते पुस्तक गेल्या नोव्हेंबरात छापील स्वरूपात प्रसिद्धही झाले. पण करोनाचा कहर काही संपलेला नाही अन् आता तर दुसऱ्या लाटेचे अक्राळविक्राळ रूप समोर येऊन ठाकले आहे.