फ्लिपकार्टवरून मागवला आयफोन, मात्र ग्राहकासोबत झाला Scam; काय आहे प्रकरण जाणून घ्या…

फ्लिपकार्टच्या रिपब्लिक डे सेलदरम्यान एका व्यक्तीने, iPhone १५ मागवला होता. मात्र, त्या व्यक्तीने जेव्हा तो फोन चालू करून पहिला तेव्हा त्याला चांगलाच धक्का बसला. आयफोनमधील बॅटरीसोबत काहीतरी घोटाळा झाला असल्याचे त्याने एक्स या सोशल मीडियावरून शेअर केले आहे. नेमके प्रकरण काय आहे ते पाहूया.

हेही वाचा : लवकरच भारतात लाँच होणार OnePlus 12 सीरिज; काय आहेत याचे फीचर्स, किंमत अन स्पेसिफिकेशन्स, जाणून घ्या…

“मी १३ जानेवारीला फ्लिपकार्टवरून आयफोन मागवला होता, त्याचे पार्सल मला १५ जानेवारीला मिळाले; मात्र फ्लिपकार्टने माझ्यासोबत चांगलाच घोटाळा केला आहे. माझी फसवणूक केली आहे. मला मिळालेल्या आयफोन १५ मध्ये बिघाड आहे. इतकेच नाही तर त्याचे पॅकिंगदेखील खोटे आहे. असे असले तरीही तक्रार केल्यानंतर आता कंपनी मला उत्पादन बदलून देत नाहीयेत”, असे अजय राजवत [@1234ajaysmart] नावाच्या व्यक्तीने त्याच्या एक्स [पूर्वीचे ट्विटर] अकाउंटवरून शेअर केले आहे. त्याबरोबरच त्याला मिळालेल्या आयफोन १५ स्मार्टफोनचे फोटो आणि व्हिडीओदेखील जोडलेले आहेत आणि फ्लिपकार्ट सपोर्टच्या अकाउंटला टॅग केले आहे.

शेअर केलेल्या फोटोंपैकी एका फोटोमध्ये फोनवरील स्क्रीनवर बॅटरी संबंधित लिहिलेला मेसेज पाहता येतो. त्यानुसार, आयफोनमध्ये बसवण्यात आलेली बॅटर खोटी असल्याचे समजते. तर दुसऱ्या फोटोमध्ये आयफोन चार्जिंगला लावल्यानंतर आलेला मेसेज पाहायला मिळतो. त्यानुसार, आयफोनमधील बॅटरी व्हेरिफाय करता येत नाही. तसेच बॅटरी हेल्थबद्दल माहिती देण्यास फोन असक्षम असल्याचे समजते.

@1234ajaysmart या अकाउंटने शेअर केलेल्या फोटो आणि व्हिडीओला आत्तापर्यंत २८.७K इतके व्ह्यूज मिळाले आहेत.