ठाणे : ठाणे जिल्ह्यासाठी हवामान विभागाने १८ आणि १९ ऑगस्टसाठी रेड अलर्ट जारी केला असून मुसळधार पाऊस कोसळणार आहे. तर २० ऑगस्ट रोजी ऑरेंज अलर्ट जाहीर केला आहे. त्यामुळे जिल्ह्यातील नागरिकांनी विशेष सतर्क राहण्याचे आवाहन प्रशासनाकडून करण्यात आले आहे. यामुळे नागरिकांनी गरज असल्यास तरच घराबाहेर पडण्याचे आवाहन करण्यात आले आहे.
गेल्या दोन दिवसांपासूनच ठाण्यात पावसाचा जोर वाढलेला असून अनेक भागांत रस्त्यांवर पाणी साचणे, वाहतुकीत अडथळे, काही ठिकाणी घरांमध्ये पाणी शिरणे अशा समस्या निर्माण झाल्या आहेत. हवामान विभागाच्या अंदाजानुसार १८ ऑगस्ट रोजी दिवसभर ठाण्यात मुसळधार पावसाची शक्यता आहे. काही ठिकाणी पावसाचा जोर अति मुसळधार स्वरूप धारण करू शकतो. दिवसाचे कमाल तापमान २८ अंश सेल्सिअस तर किमान २४ अंश सेल्सिअस इतके राहणार आहे. तर मंगळवार १९ ऑगस्ट रोजी देखील पावसाचा जोर कायम राहील आणि नद्यांच्या पाणीपातळीत वाढ होण्याची शक्यता आहे. यामुळे नागरिकांनी सतर्क राहावे असे आवाहन प्रशासनाच्या माध्यमातून करण्यात आले आहे.
मुंबई आणि आसपासच्या उपनगरांमध्ये देखील मुसळधार पाऊस सुरू असल्याने अनेक ठिकाणी पाणी साचल्याच्या घटना समोर आल्या आहेत. यामध्ये अनेक वाहने देखील अडकून पडली आहेत तर शाळेच्या गाड्या देखील अडकून पडल्या आहेत. तर मध्य रेल्वे वरील विविध रेल्वे स्थानकांवर पाणी साचल्याने लोकल सेवा देखील काही प्रमाणात विस्कळीत झाली आहे. त्यामुळे आपल्या दैनंदिन कामासाठी जाणाऱ्या प्रवाशांना देखील त्रास होत आहे. तर येत्या काही तासात याहून अधिक मुसळधार पाऊस पडणार असल्याचे हवामान खात्याकडून जाहीर करण्यात आले आहे. यामुळे जिल्ह्यातील राज्यमार्ग, महामार्गावर देखील मोठ्या प्रमाणात वाहतूक कोंडी झाली आहे.
गेल्या दोन ते दिवसांपासून होणाऱ्या मुसळधार पावसामुळे संपूर्ण ठाणे जिल्ह्याला पाणीपुरवठा करणारे बारवी धरण पूर्ण भरले असून धरणाच्या आसपासच्या वस्त्यांना देखील सतर्क राहण्याचा इशारा देण्यात आला आहे. तर जिल्ह्यातील महत्वाची नदी असलेली उल्हास नदीने अद्याप इशारा पातळी ओलांडली नसली तरी याच पद्धतीने मुसळधार पाऊस राहिल्यास नदीच्या पाणी पातळीत देखील वाढ होण्याची शक्यता आहे. याबाबत देखील जिल्हा प्रशासनाकडून नागरिकांना अवगत करण्यात आले आहे.
