Thane News, dahi handi 2025 ठाणे – ठाणे शहरात दहीहंडी उत्सवात जखमी गोविंदांच्या संख्येत वाढ झाली आहे. शनिवारी रात्री ९.३० पर्यंत गोविंदा जखमींची संख्या १७ इतकी होती. परंतु, रात्री उशिरा त्यात आणखी ५ जखमी गोविंदांची भर पडली. त्यामुळे आता, ठाणे शहरातील गोविंदा जखमींची संख्या २२ वर पोहोचली आहे.
ठाणे शहर गोविंदांची पंढरी म्हणून ओळखले जाते. या शहरात बड्या राजकीय नेत्यांकडून दहीहंडी उत्सवाचे जल्लोषात आयोजन केले जाते. ठाणे शहरातील टेंभी नाका, तलावपाळी, रघुनाथ नगर, वर्तकनगर, वसंतविहार, नौपाडा आणि रेमंड हे ठिकाण दहीहंडीचे विशेष आकर्षण आहे. याठिकाणी मोठ्या दहीहंडींचे आयोजन केले जाते. यंदाही याठिकाणी लाखोंची पारितोषिक जाहीर करण्यात आली होती.
ठाणे शहरात शनिवारी सकाळ पासून ठाण्यासह मुंबईतील गोविंदा पथक दहीहंडी फोडण्यासाठी दाखल झाले होते. विविध दहीहंडी आयोजकांकडे या पथकांनी थर रचले. त्यातील काहीजणाचे थर अचूक लागले तर, काहींचे कोसळले. पण,या चुरशीमध्ये २२ गोविंदा जखमी झाल्याची माहिती समोर आली आहे.
शनिवारी रात्री ९.३० पर्यंत गोविंदा जखमींची संख्या १७ होती. यातील कळवा येथील ठाणे महापालिकेच्या छत्रपती शिवाजी महाराज रुग्णालयात १२ गोविंदांना उपचारासाठी दाखल करण्यात आले होते. त्यानंतर, रात्री उशिरा या रुग्णालयात आणखी ०५ जखमी गोविंदा उपचारासाठी दाखल झाले होते. त्यामुळे कळवा रुग्णालयात एकूण १७ जखमी गोविंदांवर उपचार करण्यात आले. तर, ठाणे जिल्हा शासकीय रुग्णालयात एकूण ०५ रुग्णांना उपचारासाठी दाखल करण्यात आले होते. या दोन्ही रुग्णालयातील सर्वाधिक रुग्ण हे किरकोळ दुखापत झालेले होते. त्यामुळे अशा रुग्णांवर उपचार करुन त्यांना सोडण्यात आले होते. अशी माहिती ठाणे महापालिका आपत्ती व्यवस्थापन विभागाकडून देण्यात आली.
