ठाणे : ठाणे महापालिकेमार्फत दिवा शहरात चालविण्यात येत असलेला आपला दवाखाना हा महत्वाचा आरोग्य सेवा उपक्रम कोणतीही पूर्वसूचनेविनाच बंद करण्यात आला असून या निर्णयामुळे दिव्यातील पाच लाखांहून अधिक नागरिकांच्या आरोग्य हक्कावर गदा आली आहे. याआधीच फिरता दवाखाना बंद करून नागरिकांना आरोग्य सेवेपासून वंचित करण्यात आले होते आणि आता ‘आपला दवाखाना’ही बंद करून महानगरपालिकेने स्वतः दिलेल्या लिखित आश्वासनाचे उल्लंघन केले आहे, असा आरोप शिवसेना (उद्धव बाळासाहेब ठाकरे पक्ष) कल्याण ग्रामीण विधानसभा प्रमुख ॲड. रोहिदास मुंडे यांनी केला आहे.
आरोग्य ही घटना प्रदत्त मूलभूत हक्कांपैकी एक असून राज्यघटनेच्या कलम २१ अंतर्गत जीवनाचा आणि आरोग्याचा हक्क अबाधित आहे. तसेच महाराष्ट्र सार्वजनिक आरोग्य अधिनियम, १९४९ आणि महाराष्ट्र नगरपालिकेचा कायदा यानुसार ठाणे महानगरपालिकेवर नागरिकांना किमान आरोग्य सेवा पुरविण्याची वैधानिक जबाबदारी आहे. दिव्यातील नागरिकांकडून नियमित मालमत्ता कर आणि स्थानिक कर आकारले जात आहेत. तरी सुद्धा आरोग्य सेवा न पुरविणे हे सार्वजनिक निधीचा दुरुपयोग आणि नागरिकांच्या हक्कांचा भंग आहे. या निष्काळजी आणि बेकायदेशीर कृतीमुळे भारतीय दंड संहिता कलम १६६, २६९, ३३६ आणि ३०४ ए अंतर्गत जबाबदार अधिकाऱ्यांवर गुन्हा दाखल करण्याची मागणी मुंडे यांनी केली आहे.
आंदोलनचा इशारा
दिव्यात कायमस्वरुपी दवाखाना आणि चोवीस तास प्राथमिक आरोग्य केंद्र सुरू होईपर्यंत ‘आपला दवाखाना’ अखंडित सुरू ठेवणे आणि वाढत्या लोकसंख्येच्या दृष्टीने आपत्कालीन सुविधा तसेच आवश्यक वैद्यकीय कर्मचारी उपलब्ध करून देणे ही प्रशासनाची तातडीची जबाबदारी आहे. अन्यथा दिव्यातील नागरिकांना न्याय मिळविण्यासाठी आंदोलनात्मक पावले उचलावी लागतील तसेच उच्च न्यायालयात जनहित याचिका दाखल करण्याचा पर्याय खुला राहील, असा इशारा मुंडे यांनी दिला आहे. या संदर्भात त्यांनी ठाणे महापालिकेचे मुख्य आरोग्य अधिकारी डाॅ. प्रसाद पाटील यांची सोमवारी भेट घेऊन त्यांना निवेदन दिले. यावेळी कल्याण ग्रामीण विधानसभा प्रमुख रोहिदास मुंडे शहर प्रमुख सचिन पाटील महिला शहर संघटिका ज्योती पाटील युवा सेना अधिकारी अभिषेक ठाकूर विभाग प्रमुख रवी रसाळ नागेश पवार आकाश विचारे विकी मंचेवार उपस्थित होते.
आरोग्य विभागाचे म्हणणे
दिवा परिसरात दोन मोठी रुग्णालय उभारण्यात येणार आहेत. तसेच याठिकाणी दोन आरोग्यमंदिरे सुरू करण्यात आलेली आहेत. त्यामुळे येथील फिरता दवाखाना बंद करून इतरत्र भागात वळविण्यात आला आहे. याशिवाय, आणखी आरोग्यमंदीरे इथे उभारण्यात येणार आहेत. आरोग्य सेवा देण्याचे काम थांबलेले नसून ते सुरू आहे. तसेच याठिकाणी रुग्णवाहीकाही सुरू करण्याचे पालिकेने नियोजन आखलेले आहे, असे ठाणे महापालिकेचे मुख्य आरोग्य अधिकारी डाॅ. प्रसाद पाटील यांनी सांगितले.
