लोकसत्ता प्रतिनिधी
ठाणे : कोलशेत येथे कारवाईसाठी गेलेल्या अतिक्रमण विभागाच्या कर्मचाऱ्याला शिवीगाळ आणि धक्काबुक्की करण्यात आल्याचा प्रकार समोर आला आहे. याप्रकरणी कापूरबावडी पोलीस ठाण्यात चार जणांविरोधात गुन्हा दाखल करण्यात आला आहे.
आणखी वाचा-कल्याण-डोंबिवली शहरांतर्गत केडीएमटीच्या बस सुरू करा, ठाकरे गटाच्या पदाधिकाऱ्यांची मागणी
कोलशेत येथील टीएमटीच्या आगाराजवळ अनधिकृत बांधकाम सुरू असल्याची माहिती महापालिकेला मिळाली होती. त्यानुसार, बुधवारी सायंकाळी अतिक्रमण विभागात नेमणुकीस असलेले लिपीक प्रवीण तावडे हे पथकासह त्याठिकाणी गेले. त्यावेळेस पथकाने तेथील कृष्णकांत फुलोरे यांना बांधकाम परवानगी बाबत विचारले असता, कागदपत्रे नसल्याचे फुलोरे यांनी सांगितले. त्यामुळे साहाय्यक आयुक्त प्रीतम पाटील यांनी संबंधित बांधकामावर कारवाईचे आदेश दिले. त्यानुसार पथक कारवाई करत असताना कृष्णकांत फुलोरे, ओंकार फुलोरे, रेश्मा फुलोरे, गौरी फुलोरे यांनी आरडाओरड करत तावडे यांना शिवीगाळ आणि धक्काबुक्की केली. याप्रकरणी तावडे यांनी तक्रार दिल्यानंतर कापूरबावडी पोलीस ठाण्यात चौघांविरोधात गुन्हा दाखल करण्यात आला आहे.
