ठाणे : शासकीय तसेच खासगी कर्मचाऱ्यांना दिवाळीत बोनस देण्याची परंपरा असते. कर्मचाऱ्यांचा दिवाळी सण गोड व्हावा या उद्देशातून हा बोनस दिला जातो. नवी मुंबईतील ‘ सुल्झर पंप्स् इंडिया प्रा. ली.’ या इंजिनियरींग कंपनीमध्ये गणेशोत्सव काळात बोनस देण्यात येतो. त्या मागे एक कारण आहे. तसेच गेल्या काही वर्षांपासून ही कंपनी सहा आकडी बोनस देत असून यंदाच्या बोनसची रक्कम ऐकून थक्क व्हाल.
नवी मुबई, दिघा येथे ‘सुल्झर पंप्स् इंडिया प्रा. लिमिटेड’ या बहुराष्ट्रीय कंपनीत गणेशोत्सवात बोनस देण्यात येतो. तसेच सहा आकडी बोनस देण्यात येतो. यंदाही कंपनीने ही परंपरा कायम ठेवली आहे. ‘सुल्झर पंप्स् इंडिया एम्प्लाॅईज युनियन’ (सेऊ) या अंतर्गत संघटनेचे अध्यक्ष रुपेश पवार आणि जनरल सेक्रेटरी प्रमोद लोटणकर यांच्या नेतृत्वाखाली हा बोनस वाटप करण्यात आला. ९ ऑगस्ट २०२२ रोजी झालेल्या वेतनवाढ आणि बोनस कराराप्रमाणे कंपनीने कामगारांना २०२४ या वर्षाचा बोनस २२ ऑगस्ट २०२५ रोजी वाटप केला.
गणेशोत्सवात बोनस का दिला जातो
महाराष्ट्रात गणपती उत्सव आणि दिवाळी उत्सव हे दोन सण मोठ्याप्रमाणात साजरे केले जातात. पूर्वी गणेशोत्सव हा कोकणात जास्त प्रमाणात साजरा केला जायचा. तो आत्ताही साजरा केला जातो. पण हल्ली संपूर्ण महाराष्ट्रासह भारतातही बहुतेक राज्यात गणेशोत्सव साजरा केला जातो. सुल्झर पंप्स कंपनीमध्ये ‘सुल्झर पंप्स् इंडिया एम्प्लाॅईज युनियन’ ( सेऊ ) संघटनेच्या मागणी नुसार दिवाळीचा बोनस हा गणेशोत्सव साजरा करण्यासाठी दिला जातो. त्यामुळे करारा प्रमाणे बोनस हा गणेशोत्सवाच्या काही दिवस अगोदर दिला जातो असे संघटनेचे अध्यक्ष रुपेश पवार यांनी सांगितले.
बोनसचे वाटप
नवी मुबई, दिघा येथे ‘सुल्झर पंप्स् इंडिया प्रा. लिमिटेड’ या बहुराष्ट्रीय कंपनीने आपली सहा आकडी बोनस देण्याची परंपरा कायम राखत कर्मचाऱ्यांना दोन लाखाहून अधिक बोनस दिला आहे. या कंपनीमध्ये दिवाळीतला बोनस हा कराराप्रमाणे गणेशोत्सवापुर्वीच दिला जातो. जागतिक पातळीवर युद्धजनक परिस्थितीमध्ये आंतराष्ट्रीय स्तरावर पंपाच्या मागणीत घट झाली आहे. असे असतानाही अध्यक्ष रूपेश पवार यांच्या सेऊ संघटनेच्या कामगारांना कमाल बोनस २,४३,३११ रुपये तर, किमान बोनस २,२५,२३९ रूपये इतका देण्यात आला आहे.
बोनस हा नवीन कामगारांसाठी प्रेरणादायक
‘सुल्झर पंप्स् इंडिया एम्प्लाॅईज युनियन’ (सेऊ) या संघटनेने केलेल्या कराराप्रमाणे वाटप झालेला बोनस हा येणाऱ्या नवीन कामगारांसाठी खुप प्रेरणादायक असेल, असे मत बहूतेक कामगारांनी मांडले. बोनस वाटपाच्या प्रसंगी संघटनेचे अध्यक्ष रुपेश पवार यांनी सर्व कामगारांना भरघोस बोनस झाल्याबद्दल शुभेच्छा दिल्या आणि बोनसच्या रकमेचा योग्य वापर करा असा सल्ला दिला. तसेच ‘सुल्झर पंप्स् इंडिया एम्प्लाॅईज युनियन’ (सेऊ) संघटनेच्या कामगारांनी सेऊ कमिटीचे आणि सुल्झर पंप्स कंपनीच्या व्यवस्थापनाचे खुप खुप आभार मानले.
