करचोरीप्रकरणी ‘जीएसटी’ अधिकाऱ्यांकडून ठाण्यात व्यापाऱ्याला अटक

या कंपनीला अनेक व्यापाऱ्यांकडून कोणताही माल न मिळविताच, ‘इनपुट टॅक्स क्रेडिट’ मिळत होते

(प्रातिनिधिक छायाचित्र)

ठाणे : कोणत्याही वस्तू अथवा सेवा न मिळविता त्या बदल्यात सुमारे १२ कोटी रुपयांच्या कर-भरणा सुटीचा (इनपुट टॅक्स क्रेडिट) लाभ घेतल्याप्रकरणी वस्तू आणि सेवा कर विभागाच्या ठाणे आयुक्तालयाच्या अधिकाऱ्यांनी शुक्रवारी केलेल्या कारवाईत येथील मेसर्स स्टार स्क्रॅप स्टील कंपनीच्या मालकाला अटक केली.

भंगाराच्या व्यवसायात कार्यरत या कंपनीवरील या कारवाईत, मुंबईच्या वस्तू आणि सेवा कर विभागाने विकसित केलेल्या विशेष गुन्हे अन्वेषण प्रणालीची मदत मिळाली आणि तिच्या आधारे ठाणे आयुक्तालयाकडून हे करचोरी प्रकरण उघडकीस आणले गेले आहे. या कंपनीला अनेक व्यापाऱ्यांकडून कोणताही माल न मिळविताच, ‘इनपुट टॅक्स क्रेडिट’ मिळत होते. कोणत्याही मालाची पावती नसताना आणि पुरवठा केला गेलेला नसताना, फसव्या संस्थांनी जारी केलेल्या पावत्याच्या आधारे कच्च्या मालासाठी कर भरला गेल्याचा बनाव रचून, ‘इनपुट टॅक्स क्रेडिट’ मिळविले गेले. 

स्टार स्कॅ्रप स्टील कंपनीच्या नावे ‘कर-भरणा सूट’ जमा करणाऱ्या ठाणे, मुंबई, नवी मुंबई आणि रायगडमधील विविध फसव्या संस्थांचा तपास सुरू आहे. स्टार स्कॅ्रप स्टीलच्या मालकांना वस्तू आणि सेवा कर कायदा २०१७च्या तरतुदीनुसार अटक करण्यात आली आहे. प्रवर्तकांना शुक्रवारी (३ डिसेंबर) न्यायिक प्रथमवर्ग न्यायदंडाधिकारी न्यायालयात हजर करण्यात आले असून १४ दिवसांची न्यायालयीन कोठडी सुनावण्यात आली.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व ठाणे बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Gst officer arrested merchant in thane for tax evasion zws

ताज्या बातम्या