ठाणे जिल्ह्यात वेठबिगारी सुरूच; अवघ्या पाच हजार रुपयांसाठी वीटभट्टीवर कातकरी दाम्पत्याला आठ वर्ष राबविले

तक्रारदार हे मूळ पालघर जिल्ह्यातील आहे. सुमारे आठ वर्षांपूर्वी सिद्धीक शेख नावाच्या व्यक्तीने त्यांना पाच हजार रुपयांचा ‘ बयाना ’ दिला होता. या मोबदल्यात सिद्धिक हा तक्रारदार महिला आणि त्यांच्या पतीला चिखल काढणे, विटा थापणे, विटा रचणे आणि विटा वाहन्यांची कामे करवून घेत होता. या कामाबाबत त्यांना कोणतेही पैसे दिले जात नव्हते. वीट भट्टी बंद झाल्यानंतर सिद्धीक हा त्यांना पावसाळ्यात गवत कापणीचे काम करून घेत असे. त्यांना दुसऱ्या ठिकाणी काम करायचे असल्यास तिथे देखील काम करू दिले जात नव्हते. पैसे फिटेपर्यंत काम करावे लागेल अशी धमकी दिली जात होती. तसेच कामात चूक झाल्यास किंवा काम करण्यास उशीर झाल्यास त्यांना मारझोड केली जात होती.

हेही वाचा : ठाणे : घोडबंदर मार्गावर अपघातामुळे कोंडी

तक्रारदार महिलेसह या वीट भट्टीवर १० ते १२ जण वेठबिगारी म्हणून काम करत होते. त्यांनाही असाच त्रास सहन करावा लागत होता. या त्रासाला कंटाळून त्यांनी भिवंडीतील चिंबीपाडा येथील श्रमजीवी संघटनेच्या कार्यकर्त्या अलका भोईर यांना याबाबत माहिती दिली. त्यानंतर श्रमजीवी संघटनेच्या कर्मचाऱ्यांनी भिवंडी तालुका पोलीस ठाण्यात धाव घेऊन तक्रार दाखल केली. या तक्रारीच्या आधारे सिद्धीक विरोधात गुन्हा दाखल करण्यात आला आहे. गुन्हा दाखल झाल्यानंतर श्रमजीवी संघटनेने भिवंडीचे तहसीलदार अधिक पाटील यांची भेट घेतली. अधिक पाटील यांनी या सर्व वेठबिगारींची मुक्तता करून त्यांना पूनर्वसन प्रमाणपत्र प्रदान केले आहे.

हेही वाचा : कल्याणमध्ये ज्येष्ठ नागरिकाची १४ लाखांची फसवणूक

काही महिन्यांपू्र्वी ठाणे आणि पालघर जि्ल्ह्यातील आदिवासी मुलांचाही नगर जिल्ह्यात वेठबिगारी म्हणून वापर होत असल्याचा प्रकार समोर आला होता. भिवंडी तालुक्यातील दोन मुलांची आणि पालघर जिल्ह्यातील दोन मुलींची अवघ्या ५०० ते एक हजार रुपयांमध्ये वेठबिगारी म्हणून खरेदी करण्यात आली होती. या मुलांकडून जनावरे सांभाळणे, शेण काढणे तसेच घरातील विविध कामे मेंढपाळ करुन घेत होते. तसेच त्यांना शिवीगाळही करत. याप्रकरणी नगर जिल्ह्यातील मेंढपाळांविरोधात भिवंडीतील पडघा पोलीस ठाण्यात गुन्हा दाखल करण्यात आले होते. त्यामुळे जिल्ह्यात वेठबिगारीचे प्रकार सुरूच असल्याचे समोर आले आहे.