कल्याणमध्ये इराणी वस्तीमधील महिला मेफेड्रोनची तस्करी करताना अटक

खडकपाडा पोलीस ठाण्याचे अंमली पदार्थ विरोध पथक बुधवारी दुपारी आंबिवली इराणी वस्ती परिसरात गस्त घालत होते. त्यावेळी त्यांना अटाळी आंबिवली रस्त्यावरील ९० फुटी रस्त्याच्या कडेला एक दुचाकी वाहन उभे असल्याचे दिसले. त्या स्कुटीजवळ एक महिला उभी होती. पोलिसांना हा प्रकार संशयास्पद वाटल्याने पोलिसांनी त्या महिलेकडे चौकशी केली आणि तिच्या ताब्यातील स्कुटीची तपासणी केली. स्कुटीच्या आसनाखालील वस्तू ठेवण्याच्या जागेत बंदिस्त केलेली मेफेड्रोनची पावडर आढळून आली. पोलिसांनी तिला तात्काळ ताब्यात घेतले. तिची कसून चौकशी सुरू केल्यावर तिने उडवाउडवीची उत्तरे देण्यास सुरूवात केली. ही मेफोड्रेन पावडर तिने कोठुन आणली होती. ती पावडर ती कोणाला विकणार होती, याचा तपास पोलिसांनी सुरू केला आहे. गेल्याच आठवड्यात पोलिसांनी आंबिवली पाटीलनगर भागातून अंमली पदार्थांची तस्करी करणाऱ्या इसमाला अटक केली होती. इराणी वस्तीमधील काही गुन्हेगारांकडून शहर परिसरात अधिक प्रमाणात अंमली पदार्थांची तस्करी होत असल्याचा पोलिसांना संशय आहे. त्यामुळे या वस्ती परिसरात पोलिसांची सतत गस्त असते.

कोळसेवाडी पोलीस ठाण्याचे पोलीस निरीक्षक सबाजी नाईक, साहाय्यक पोलीस निरीक्षक अनिल गायकवाड, उपनिरीक्षक जितेंद्र ठोके, हवालदार सदाशिव देवरे, अमित शिंदे, राहुल शिंदे, सुनिता होडगर, भावना भट यांच्या पथकाने ही अटकेची कारवाई केली.