कळव्यामुळे ठाणे, नवी मुंबई ‘जॅम’

कळवा खाडीवरील जुना ब्रिटिशकालीन पूल वाहतुकीस पूर्णपणे बंद झाल्याने नवीन पुलावर वाहनांचा भार वाढला असतानाच गुरुवारी दुपारच्या सुमारास या पुलावर एक टेम्पो बंद पडल्याने कळव्यासह ठाणे आणि नवी मुंबईतील संपूर्ण वाहतूक व्यवस्था कोलमडून पडली. कळवा नाक्यापासून ठाणे कारागृह रस्ता, साकेत, विटावा या भागांपर्यंतच्या दोन-दोन किमीच्या पट्टय़ातील रस्त्यांवर वाहनांच्या चार-चार रांगा लागल्या होत्या. नारळी पौर्णिमेच्या निमित्ताने कळवा नाका परिसरात बुधवारी अभूतपूर्व वाहतूक कोंडी पाहायला मिळाली असताना गुरुवारी रक्षाबंधनासाठी वाहने घेऊन घराबाहेर पडलेल्यांना सुमारे दीड तास वाहतूक कोंडीत अडकून पडावे लागले.

ठाणे आणि कळवा शहरांना जोडणारा ब्रिटिशकालीन पूल महाडच्या घटनेनंतर वाहतुकीसाठी बंद करण्यात आला आहे. त्यामुळे या दोन्ही शहरातील वाहतूक एकच खाडी पुलावरून सुरू आहे. ठाणे आणि कळवा या दोन्ही शहरांतील वाहतुकीपुरताच हा पूल मर्यादित नाही तर या पुलावरून मुंब्रा, नवी मुंबई, घोडबंदर, भिवंडी तसेच नाशिक दिशेने जाणाऱ्या वाहनांची वाहतूक सुरू असते. त्यामुळे या भागातून वाहतूक करणाऱ्या वाहनांचा आकडा मोठा आहे. ब्रिटिशकालीन खाडीपूल वाहतुकीसाठी बंद केल्यामुळे नवीन खाडी पुलावर वाहनांचा भार वाढला असून त्यामुळे ऐन सकाळ आणि सायंकाळी गर्दीच्या वेळेत कोंडी होऊ लागली आहे. त्याचबरोबर कळवा-विटावा मार्गावर तिसऱ्या खाडी पुलाचे काम सुरू असल्यामुळे कोंडीत आणखी भर पडत आहे. असे असतानाच गुरुवारी दुपारी कळव्याहून ठाण्याच्या दिशेने येणारा एक टेम्पो नवीन खाडी पुलावर बंद पडला. त्यामुळे वाहतुकीस अडथळा निर्माण होऊन वाहनांच्या पाठीमागे रांगा लागल्या. त्यानंतर कळवा चौकात कोंडी झाल्याने वाहतूक पूर्णपणे खोळंबली. वाहतूक शाखेच्या पोलिसांनी टेम्पोला बाजूला काढून वाहतुकीस मार्ग मोकळा करून दिला, पण तोपर्यंत वाहनांच्या रांगा नवी मुंबईच्या हद्दीपर्यंत पोहोचल्या होत्या. त्याचबरोबर ठाण्यातील साकेत रोड, दादोजी कोंडदेव प्रेक्षागृह आणि ठाणे कारागृह या भागातही वाहतूक कोंडी झाली. त्यात अडकून पडल्यामुळे वाहनचालक तसेच प्रवासी अक्षरश: हैराण झाले होते. या भागातील वाहतूक संथगतीने सुरू असल्यामुळे नवी मुंबईच्या प्रवेशद्वारापासून ते कळवा नाक्यापर्यंतचे अंतर पार करण्यासाठी एक तासाहून अधिक वेळ लागत होता, असे वाहनचालक तसेच प्रवाशांकडून सांगण्यात आले.