कल्याण : शौचालय साफसफाई देयकाच्या कागदपत्रांवर स्वाक्षरी करण्यासाठी १५ हजारांच्या लाचेची मागणी करणारा कल्याण डोंबिवली महापालिकेचा प्रभारी कार्यकारी अभियंता बाळासाहेब जाधव (५६) याला ठाणे लाचलुचपत प्रतिबंधक विभागाने रंगेहात पकडले. तक्रारदार हे कल्याण डोंबिवली महापालिकेच्या साफसफाईचे ठेके घेतात. त्यांच्या ७ लाख ९८ हजार रुपयांच्या शौचालय साफसफाई देयक कागदपत्रांवर बाळासाहेब जाधव यांची स्वाक्षरी हवी होती. यासाठी जाधव याने ठेकेदाराकडून १६ हजार रुपयांची लाच मागितली. ठेकेदाराने याची माहिती ठाणे लाचलुचपत प्रतिबंधक विभागाला दिली. या तक्रारीची पडताळणी करून ठाणे लाचलुचपत प्रतिबंधक विभागाने १५ हजार रुपयांची लाच घेताना जाधव याला रंगेहात पकडले आहे.
